ДУШАНБЕ, 1 авг — Sputnik. Тибқи иттилои ин ниҳод Ҷумазода ба гирифтани 1,5 ҳазор доллар пора барои сабук кардани ҷазои як муттаҳам айбдор шуда, ба ивази ин маблағ ваъда додааст, ки айбдоршавандаро аз ҳуқуқи ронандагӣ низ маҳрум намекунад.
Ҷумазода Икром Абдусалом, 30 июл бо фармони раисиҷумҳури Тоҷикистон ба далели содир намудани кирдоре, ки шаъну эътибори судяро паст мезанад, аз мақоми раиси додгоҳи Айнӣ барканор шуд.
Раёсати Ожонси мубориза бо фасод дар мавриди Саидшо Шарипов, нозири роҳи Раёсати ВКД дар Кӯлоб, ки аз сайёҳи Руминия пора талаб карда буд, иттилоъ дод, ки алайҳи Шарипов парванда қатъ шуд. Сулаймон Султонзода, раиси Ожонси мубориза бо фасод, далели қатъи парвандаро иқрору пушаймонии софдилона, рондани Шарипов аз мақомоти умури дохилӣ ва доштани кӯдакони ноболиғ гуфт.
Шарипов ва ҳамроҳонаш тобистони соли гузашта сайёҳони руминиягиро барои ҳаракат бо суръати аз меъёр баланд, боздошт карда, танҳо баъди гирифтани 200 сомонӣ пора раҳо карданд. Сайёҳи руминиягӣ ин лаҳзаро ба навор гирифт ва дар интернет нашр карда буд.
Ахиран Эмомалӣ Раҳмон, раисиҷумҳури Тоҷикистон, афродеро, ки аз сайёҳон ва меҳмонони кишвар пора тамаъ мекунанд, ба хиёнаткорон баробар намуда, хостори муборизаи шадид бо фасодкории масъулин шуд.
