ДУШАНБЕ, 14 дек— Sputnik. Тоҷикистон муваққатан марз бо Афғонистонро баст. Дар ин бора "ТоҷикТА". хабар медиҳад.
Ин иқдом ба хотири таъмини амният пеш гирифта шудааст.
"Ҳукумати Тоҷикистон ба хотири таъмини амният муваққатан як гузаргоҳи бузургро дар ҳудуди вилояти Бадахшону ноҳияи Шамсиддин Шоҳини вилояти Хатлон баст", —хабар доданд аз ҳукумати вилояти Хатлон.
Дар айни ҳол ҳаракат тариқи панҷ пули дарёи Панҷ ва як гузаргоҳ баста шудааст.
Вале сухангӯи нирӯҳои марзбонии Кумитаи давлатии амнияти миллии Тоҷикистон Муҳаммад Улуғхоҷаев хабари баста шудани марз бо Афғонистонро рад кард.
Волии вилояти Бадахшони Афғонистон Аҳмад Файсал Бекзод бошад, хабари баста шудани мархзро таъйид кард.
Ба гуфти ӯ дар ҳоли ҳозир ҳукумати Афғонистон бо ҷониби Тоҷикистон бобати кушодани гузаргоҳҳо гуфтушунид дорад, то бошандагони манотиқи марзӣ дар фасли сармо аз дунё канда нашаванд.
"Кушодани марз ва фаъол будани пулҳо муҳиму ҳаётӣ барои мост. Мо роҳи хуб бо марказ надорем. Бахусус дар ин шабу рӯз ва барфбориҳо роҳ ба марказ мушкилгузар аст. Аз ин рӯ, тамоми маводи ғизоӣ аз самти Тоҷикистон ворид мешавад". — гуфтаст ӯ.
Сабаби баста шудани марз бо Афғонистон муқовимати мусаллаҳона дар мавзеъи кӯҳии деҳаи Навободи ҷамоати деҳоти Саричашмаи ноҳияи Шамсиддин Шоҳини вилояти Хатлон буд, ки дар паи он сарфармондеҳи Тоҷикистон Хайриддин Аҳтамов кушта шуд.
Дар натиҷаи кашокашӣ ҳамчунин се кас аз қочоқбарон нобуд карда шуданду чаҳор марзбони дигари тоҷик ҷароҳатҳои гуногун бардоштанд.
Вазорати умури хориҷаи Тоҷикистон аз Афғонистон талаб кард, ки қазияи кушта шудани фармондеҳи тоҷик дар паи задухӯрд дар марзи Тоҷикистону Афғонистонро пайгирӣ ва ҷинояткоронро дастгир кунанд.
