ДУШАНБЕ, 23 ноя — Sputnik. Ба иттилоъи хадамоти матбуотии раисҷумҳури Тоҷикистон, Эмомалӣ Раҳмон имрӯз раҳбари нави Намояндагии Хадамоти гумруки ҶТ дар Русияро таъйин кард.
"Ҷӯрабекзода Эраҷ Тоҷиддин Роҳбари Намояндагии Хадамоти гумруки назди Ҳукумати Ҷумҳурии Тоҷикистон дар Федератсияи Россия таъин карда шавад", — гуфта мешавад дар матни қароре, ки Раиси Ҳукумати Ҷумҳурии Тоҷикистон Эмомалӣ Раҳмон имзо кардааст.
Ёдовар мешавем, ки дирӯз, 22 ноябр бо Қарори Ҳукумати Ҷумҳурии Тоҷикистон Исматулло Насриддинов муовини вазири умури хориҷии Ҷумҳурии Тоҷикистон таъйин гардид.
Ҳамчунин бо Қарори Ҳукумати Ҷумҳурии Тоҷикистон консулҳои генералӣ дар шаҳрҳои Маскав, Уфа, Алмаато ва муовини мудири Дафтари Кумитаи иҷроии Иттиҳоди давлатҳои мустақил дар шаҳри Минск низ таъйин шуданд.
