ДУШАНБЕ, 6 июл — Sputnik. Имрӯз кишвардори Тоҷикистон Эмомалӣ Раҳмон дар Бӯстонсарои ҳукуматии кишвар "Пуғус" дар дараи Варзоб дар мулоқоти Сарони давлатҳо ва ҳукуматҳои кишварҳои иштирокчии тарҳи CASA — 1000 иштирок ва суханронӣ намуд, хабар медиҳад хадамоти матбуоти раисҷумҳури кишвар.
Дар маҳалли баргузории мулоқот меҳмононро худи Эмомалӣ Раҳмон истиқбол гирифт.
Пас аз маросими аксбардорӣ мулоқоти сарони давлатҳо ва ҳукуматҳои кишварҳои иштирокдори лоиҳаи CASA — 1000 бо иштироки ҳайатҳои ҳукуматҳои Тоҷикистон, Покистон, Афғонистон ва Қирғизистон бо иштироки намояндагони як қатор ташкилотҳои молиявии ҷаҳонӣ баргузор шуд.
Дар вохӯрии сатҳи баланд ҳамчунин Раисҷумҳури Афғонистон Муҳаммад Ашраф Ғанӣ, Сарвазири Ҷумҳурии Исломии Покистон Муҳаммад Навоз Шариф ва Сарвазири Ҷумҳурии Қирғизистон Сооронбай Жээнбеков иштирок доштанд.
"Раисҷумҳури Тоҷикистон меҳмононро ба сарзамини Тоҷикистон хайрамақдам гуфта, омодагию ҳавсмандии Тоҷикистонро барои иштироки фаъол дар татбиқи саривақтии лоиҳаи минтақавии CASA — 1000 таъкид намуд",- омадааст дар гузориши манбаъ.
Эмомалӣ Раҳмон изҳор дошт, ки амали анҷомдода дар ин самт на танҳо ба манфиати давлати мо балки ба манфиати кулли давлатҳои минтақа мебошад.
Таъкид гардид, ки аз ҷумлаи лоиҳаҳои бузурги минтақавии энергетикӣ, ҳамкориро дар дигар арсаҳои ҳаётан муҳим тақвият мебахшад.
Ҳамчунин, тарҳи CASA — 1000 унсури калидии бозори энергетикии минтақа ва пайвандсози тавлидкунандагону истеъмолкунандагони неруи барқ дар арсаи ду минтақа арзёбӣ шуда, имкониятҳои Тоҷикистон дар интиқоли неруи барқ тавассути афзоиши иқтидорҳои тавлиди неруи барқи дохилӣ дар тамоми сол муаррифӣ гардид.
Эмомалӣ Раҳмон лоиҳаи CASA — 1000-ро воситаи муосири амаликунонии меъёрҳои нави тиҷоратӣ ва фанновариҳои муосир дар иқтисодиёти давлатҳо маъниндод карда, нақши муҳими шарикони рушдро дар таҳия ва татбиқи лоиҳа таъкид намуд.
Дар мулоқоти Сарони давлатҳо ва ҳукуматҳои кишварҳои иштирокдори тарҳи CASA — 1000 ҳамчунин Раисҷумҳури Ҷумҳурии Исломии Афғонистон Муҳаммад Ашраф Ғанӣ, Сарвазири Ҷумҳурии Исломии Покистон Муҳаммад Навоз Шариф, Сарвазири Ҷумҳурии Қирғизистон Сооронбай Жээнбеков ва намояндаи Бонки ҷаҳонӣ Ранҷит Ламек суханронӣ карда, оид ба нақш ва мавқеи давлатҳои худ дар роҳи татбиқи лоиҳаи бузурги минтақавии CASA — 1000 фикру мулоҳизаҳои судманд ва таклифу пешниҳодҳои асоснок баён намуданд.
Дар интиҳои кори ҳамоиш Эъломияи муштарак оид ба натиҷаҳои мулоқоти сарони давлатҳо ва ҳукуматҳои иштирокдори лоиҳаи CASA-1000 қабул гардид, ки нишона аз ҷамъбасти бобарори ин чорабинии сатҳи минтақавӣ мебошад.
Ёдовар мешавем, ки 12 майи соли 2016 дар шаҳри Турсунзода раиси иҷроияи Ҷумҳурии Исломии Афғонистон Абдулло Абдулло, Сарвазири Ҷумҳурии Исломии Покистон Муҳаммад Навоз Шариф ва Сарвазири Ҷумҳурии Қирғизистон Сооронбай Жеенбеков ба оғози татбиқи Лоиҳаи минтақавии интиқоли нерӯи барқи CASA-1000 асос гузошта шуда буд.
