ДУШАНБЕ, 30 апр - Sputnik. Ба иттилои мақомоти Тоҷикистон дар се моҳи соли равон дар Тоҷикистон 93 ҳазор литр арақ истеҳсол шудааст
Дар моҳҳои январ–марти соли равон дар Тоҷикистон истеҳсоли арақ ва маҳсулоти ликёру арақ ба 9,3 ҳазор декалитр ё 93 ҳазор литр баробар гардидааст.
Дар ин бора Агентии омори Тоҷикистон хабар додааст.
Ба иттилои манбаъ, нишондиҳандаи мазкур нисбат ба ҳамин давраи соли гузашта 82,4%-ро ташкил дода, коҳишёбиро дар ҳаҷми истеҳсолот инъикос менамояд.
Қайд карда шудааст, ки дар моҳҳои январ–марти соли гузашта ҳаҷми истеҳсоли арақ ва маҳсулоти ликёру арақ 11,2 ҳазор декалитрро ташкил дода буд.
Ҳамин тариқ ба иттилои Агентии омор, дар давраи ҳисоботӣ коҳиш 1,9 ҳазор декалитр ё 19 ҳазор литр ба қайд гирифта шудааст.
Ин ниҳод қайд кардааст, ки паст гардидани ҳаҷми истеҳсоли ин намуди маҳсулот метавонад ба як қатор омилҳо, аз ҷумла тағйирёбии талаботи бозор, танзими давлатӣ дар самти маҳдудсозии истеъмоли нӯшокиҳои спиртӣ ва ё бозсозии равандҳои истеҳсолӣ вобаста бошад.