ДУШАНБЕ, 13 апр – Sputnik. Рақобатпазирии бахши саноат дар Иттиҳоди иқтисодии Авруосиё (ИИАО) афзоиш ёфтааст.
Дар ин бора хадамоти матбуоти Комиссияи иқтисодии Авруосиё (КИАО) хабар дод.
Мисолҳои муваффақонаи татбиқи механизми рушди молиявӣ аз ҷониби Виталий Вовк, муовини директори Департаменти сиёсати саноатӣ, дар конфронси 9-уми байналмилалии "Стратегияҳои иқтисодии ИИАО: Мушкилот ва навовариҳо" муаррифӣ карда шуданд.
"Ин ҳама натиҷаи кори ҳамоҳангшудаи тиҷорат ва мақомоти ваколатдори давлатӣ мебошад. Бо ин роҳ, мо вазифаи баланд бардоштани рақобатпазирии бахши саноатро дар кишварҳои узви иттиҳод ва таблиғи маҳсулоти худро дар бозорҳои дохилӣ ва хориҷӣ иҷро мекунем", - қайд кард ӯ.
Ба гуфтаи Вовк, мисолҳои муваффақонаи татбиқи механизми дастгирии молиявии ҳамкории саноатӣ дар доираи ИИАО самаранокии онро нишон медиҳанд.
Таъкид мешавад, ки намояндагони нӯҳ кишвар дар муҳокимаи ин масъала ширкат варзиданд.
Иттиҳоди иқтисодии Авруосиё як созмони байналмилалии ҳамгироии иқтисодии минтақавӣ буда, тибқи Шартнома дар бораи ИИАЭ таъсис ёфтааст.
Ин иттиҳод ҳаракати озоди молҳо, хизматрасонӣ, сармоя ва қувваи корӣ, инчунин татбиқи сиёсати ҳамоҳангшуда, мувофиқашуда ё муттаҳидшударо дар бахшҳои иқтисодӣ таъмин мекунад.
Аъзоёни созмон Русия, Арманистон, Беларус, Қазоқистон ва Қирғизистон мебошанд. Аз соли 2015 инҷониб, Тоҷикистон масъалаи пайвастан ба ин иттиҳодро баррасӣ мекунад.