Бозсозии қалъаи сеҳазорсолаи Тоҷикистон ба ривояти тасвир - аксҳо

Масоҳати умумии қалъа, ки феълан бозсозии он ҷараён дорад, 6 гектарро ташкил медиҳад.

Лоиҳаи бозсозӣ аз бинои маъмурӣ, осорхона, маҳаллаи қадимаи шаҳр, чойхона, ҳаммомхона, меҳмонхона, девори қадимаи ҳокимнишин, растаҳои савдо иборат мебошад.

Дар маҳаллаи бунёдшаванда ҳавлиҳои қадимӣ низ сохта мешаванд.

Аз ҷумла ҳавлии ҳунармандон - кулолгарон, сангтарошон, заргарон, тоҷирон, табибон, хаттотон, оҳангарон низ бунёд мегардад.

Ҳар як ҳавлӣ дар қалъаи бозсозишаванда муаррифкунандаи таърихи асрҳои ХV-ХVI хоҳад буд.

Дар бинои осорхона бошад, панҷ толор бунёд мегарданд, ки ҳар як толор тақсимбандӣ шудааст.

Аз ҷумла толори илмӣ - адабӣ, бостоншиносӣ, Истиқлоли давлатии Тоҷикистон, санъати тасвирӣ, таърихи шаҳри Хуҷанд бунёд мегарданд.

Даромадгоҳи асосии қалъа аз дохили боғи фарҳангиву фароғатии ба номи Камоли Хуҷандӣ ва се даромадгоҳи иловагӣ аз тарафи девори ҷанубӣ гузошта мешавад.

Дар баробари ин дар саҳни қалъа ду фаввораи калон бунёд меёбад.

Корҳои таҷдиду навсозӣ бо назардошти пешниҳодоти олимону таърихшиносон сурат гирифта, нишонаҳои таърихии ёдгории қадимӣ ҳифз карда мешавад.

Феълан дар бозсозӣ беш аз 100 ҳунарманд ва зиёда аз 300 сохтмончӣ машғули коранд.

Раиси Суғд, Раҷаббой Аҳмадзода дастур дод, ки корҳо босифат ва саривақт анҷом дода шаванд.