ДУШАНБЕ, 31 январ - Sputnik. Президенти Тоҷикистон Эмомалӣ Раҳмон мардуми кишварро бо иди миллии Сада табрик гуфт, хабар медиҳад хадамоти матбуоти сарвари ҷумҳурӣ.
Раисиҷумҳур дар паёми худ аҳамияти ҷашнро барои мардуми тоҷик таъкид карда, гуфтааст, Сада дарвоқеъ, таҷассуми ғояҳои неки башардӯстона буда, мардумро ба дӯстиву бародарӣ ва заҳмату ободкорӣ даъват менамояд.
Ба гуфтаи президенти ҷумҳурӣ, Сада иди деҳқонон аст. Вай изҳори итминон кард, ки боғдорони тоҷик ба корҳои баҳорӣ саривақт шурӯъ хоҳанд кард, то дар оянда ҳосили хуб ва пурсамар ба даст оранд.
"Хусусан, имсол, ки тибқи пешгӯии мутахассисону коршиносон ва таҳлилҳои созмонҳои бонуфузи байналмилалӣ соли вазнину душвор меояд, кишоварзони мо бояд аз соли гузашта низ беҳтар заҳмат кашида, ҳарчи бештар маҳсулоти ғизоӣ истеҳсол намоянд",-таъкид кардааст, президент.
Сукунат ё тӯфон - ҳавосанҷи иқтисодии Тоҷикистон дар соли 2021 ба куҷо ишора мекунанд
Раисиҷумҳур гуфт, ки деҳқонону боғдорони мо бояд ин рӯзҳоро самаранок истифода бурда, ба мардум ниҳолҳои беҳтарину серҳосил ва тухмиҳои аълосифатро пешкаш гардонанд ва бо ҳамин роҳ ҳифзи амнияти озуқавории мамлакат, рушди соҳаи кишоварзӣ ва ободии Ватани маҳбубамон, саҳми муносиби худро гузоранд.
Ин вақт, ба гуфтаи президент, барои тоза кардани боғҳои кӯҳна ва парвариши ниҳолҳо барои боғҳои нав хеле хуб аст.
Эмомалӣ Раҳмон аз сокинон даъват ба амал овардааст, ки бо истифода аз ҳар рӯзи мусоиди ин айём ба тозаву озода кардани хонаву кошона ва маҳалли зисти худ машғул бошанд, корҳои ободониро вусъат диҳанд ва ба истиқболи ҷашни бузурги миллиамон – Наврӯз кӯчаву хиёбонҳо ва шаҳру деҳотро ободу зебо гардонанд.
Ёдовар мешавем, ки ин ҷашн имрӯз дар сатҳи баланд дар Душанбе таҷлил карда мешавад. Дар Боғи фарҳангу фароғатии ба номи Фирдавсӣ намоишгоҳи тухмиҳо, техникаи кишоварзӣ ва ҳайвоноти зотӣ ташкил карда мешавад.
Як сол кам аст: коршинос чуну чарои лағви андози замин дар Тоҷикистонро шарҳ дод
Ғайр аз ин, дар ин ҷо метавон хӯрокҳои миллии тоҷикиро чашиду, ниҳолҳои дарахтҳо ва ҳунарҳои дастиро харид.
