ДУШАНБЕ, 12 янв — Sputnik. Кормандони Институти таърих, бостоншиносӣ ва мардумшиносии ба номи А. Дониши АМИТ ба ЮНЕСКО пешниҳод намуданд, ки 2500 - солагии ёдгории Шаҳристони "Тахти Сангин" - и ноҳияи Қубодиёнро ба рӯйхати ҷашнҳо ва бузургдоштҳое, ки созмон солҳои 2022 - 2023 дар сатҳи ҷаҳонӣ таҷлил мекунад, ворид намояд, иттилоъ додааст рӯзномаи "Ҷумҳурият".
"Ҳуҷҷатҳои лозима, аллакай, ба ЮНЕСКО пешниҳод шудаанд. Агар дархости мо пазируфта шавад, соли 2022 - ум 2500 - солагии ин ёдгории нодир дар сатҳи ҷаҳонӣ таҷлил хоҳад шуд", - иттилоъ додааст Институти таърих, бостоншиносӣ ва мардумшиносии ба номи А. Дониши АМИТ.
Гуфта шудааст, ки маҳз ба ҳамин хотир қарор аст, дар соли 2021 калонтарин экспедитсияи бостоншиносӣ дар мавзеи "Тахти Сангин" роҳандозӣ шавад.
Шаҳристони "Тахти Сангин" ёдгории нодири асрҳои lV то милод – III милодӣ буда, дар баробари Қалъаи Ҳисор, Дайри буддоии Аҷинатеппа, мадрасаи Хоҷа Машҳад ва шаҳри Ҳулбук барои ворид шудан ба Феҳристи ҷаҳонии фарҳангии ЮНЕСКО пешниҳод шудааст.
