ДУШАНБЕ, 24 сен — Sputnik. Номзадии президенти Русия Владимир Путин ба ҷоизаи Нобел пешниҳод шуд.
Дархостро барои ҷоизаи ҷаҳонии сулҳи соли 2021 рӯзи 10 сентябр Сергей Комков равон кардааст.
Сиёсатмадори рус бори сеюм ба ҷоизаи ҷаҳонии Нобел пешбарӣ мешавад.
Ҳамин тавр, бори аввал Путинро соли 2013 пешбарӣ карда буданд. Он замон лорди бритонӣ Питер Траскотт нақши бузурги Владимир Путинро дар қазияи Сурия дида буд. Номзадии Путинро ҳамчунин президенти бунёди умумирусиягии маориф Сергей Комков пешниҳод карда буд.
Чунин пешниҳод соли 2014 аз ҷониби Академияи байналмилалии ваҳдати маънавӣ ва ҳамкорӣ сурат гирифта буд. Ин пешниҳодро аз ҷумла ҳунарманди машҳури рус вакили думаи давлатӣ Иосиф Кобзон бо имзои худ дастгирӣ карда буд.
Дар баробари ин масъалаи ба ҷоизаи Нобел пешниҳод кардани Владимир Путин соли 2016 низ баррасӣ шуда буд.
Ҷоизаи Нобел яке аз ҷоизаҳои қиматбаҳои байналмилалӣ дар дунё шинохта шудааст.
Ин ҷоиза ҳарсол ба олимони соҳаҳои гуногун барои ихтироъкориҳо ва навовариҳои намоён дода мешавад.
Дар васиятномаи Нобел ҷудо намудани ҷоиза барои ихтироот дар соҳаҳои физика, химия, физиология ва ё тиб, адабиёт пешбинӣ шуда буд.
Ҳамчунин ин ҷоиза барои пойбарҷо гузоштани сулҳ дар рӯи замин дода мешавад.
