ДУШАНБЕ, 27 апр — Sputnik. Бахши мероси фарҳангӣ ва илмҳои гуманитарии Донишгоҳи Осиёи Марказӣ маҷмӯаи китобҳои мероси фарҳангиашро дар сомонаи Донишгоҳ дар дастрасии ройгон қарор додааст.
Тибқи иттилои котиботи Донишгоҳ, мақолаҳои фарогири мавзӯҳои таърих ва мероси фарҳангии Осиёи Марказӣ, Помир ва Қирғизистон ба забонҳои англисӣ, русӣ ва қирғизӣ дар дастраси умум мебошанд.
Манбаъ афзуд, китоби панҷҷилдаи “Санъати мусиқии Помир”, “Сурудҳои маросими дафни қирғизҳои Помир”, “Ривоятҳои таърихӣ ва этнографии чӯпонҳои қирғизи Узбекистони шӯравӣ”, “Осори бостонии Тян-Шан” ва “Таҳлил мусиқии Қирғизистон” аз ҷумлаи китобҳои дастрас мебошанд. Панҷ мақолаи таҳқиқии Бахши мероси фарҳангӣ ва илмҳои гуманитарӣ низ барои боргирии ройгон дастрасанд.
Ин маҷмӯаи китобҳо ба тарвиҷи шинохти фарҳангҳо ва наслҳо ва дастгирии пажуҳишгарони Осиёи Марказӣ дар заминаи анҷом додани таҳқиқотҳои босифат ва аслӣ, нашр ва тавзеъ намудани корҳои онҳо барои мухотабони минтақа ва ҷаҳон мусоидат мекунанд. Инчунин метавонед китобҳои мазкурро аз Бахши мероси фарҳангӣ ва илмҳои гуманитарии Донишгоҳи Осиёи Марказӣ харидорӣ кунед.
Намояндагони донишҳои суннатӣ дар ҳоли куҳансол шудан ҳастанд ва ин раванд дар канори падидаҳои дигар ба монанди манбаъҳои маҳдуд, муҳоҷират ва таъсироти хориҷӣ ин донишҳоро зери хатар мегузорад. Кумак ба мардуми Осиёи Марказӣ ҷиҳати ҳифзи суннатҳо ва мероси ғании фарҳангӣ ба унвони дороӣ барои оянда яке аз рисолатҳо муҳими Донишгоҳи Осиёи Марказӣ мебошад, ки ин маҷмӯаи китобҳо ва мақолаҳои пажуҳишӣ дар ин росто нақши бузург доранд.
