ДУШАНБЕ, 1 апр - Sputnik. Шумораи гирифторони коронавирус дар се давлати Осиёи Марказӣ — Қазоқистон, Ӯзбекистон ва Қирғизистон, ки аъзои Иттиҳоди Давлатҳои Мустақил (ИДМ) низ мебошанд, бештар шуда, мутаносибан 348, 172 ва 107 нафарро ташкил медиҳад. Дар ин бора АМИТ «Ховар» бо истинод ба маълумоти Созмони ҷаҳонии беҳдошт хабар медиҳад.
Дар дигар давлатҳои аъзои ИДМ, аз ҷумла дар Русия 2337 ҳолат, Украина – 645, Арманистон – 532, Молдова – 353, Озарбойҷон – 298 ва Беларус – 152 ҳолати сироятёбӣ ошкор гардид.
Дар ҳамаи ин давлатҳо шумораи беморони шифоёфта низ рӯз аз рӯз меафзояд. Масалан, то имрӯз дар Россия 121 нафар, Беларус — 47, Арманистон — 30, Озарбойҷон — 26, Қазоқистон — 24, Молдова — 18, Украина – 10, Ӯзбекистон – 7 ва Қирғизистон — 3 нафар шифо ёфта, ба манзили зисташон баргаштанд.
Дар баробари ин, дар Россия 17 ҳолат, Украина – 17, Озарбойҷон – 5, Молдова – 4, Арманистон – 3, Ӯзбекистон — 2, Қазоқистон — 2 ва Беларус — 1 ҳолати фавти беморони гирифтори коронавирус ба қайд гирифта шуд.
Миёни давлатҳои Осиёи Марказӣ ва ИДМ танҳо дар Тоҷикистон ва Туркманистон то имрӯз ягон ҳолати сирояти коронавирус ба қайд гирифта нашудааст.
Дар Афғонистони ҳамсоя низ шумораи мубталоён ба коронавирус зиёд шуда, 174 нафарро ташкил медиҳад, ки панҷ нафари онҳо шифо ёфта, чор тани дигар вафот кардаанд.
Мувофиқи маълумоти нави СУТ, ҳамагӣ дар ҷаҳон беш аз 858 ҳазор нафар ба коронавирус гирифтор шудаанд, ки аз ин шумора зиёда аз 42 ҳазор нафар вафот карда, зиёда аз 178 ҳазор кас шифо ёфтаанд ва беш аз 32 ҳазор тан дар ҳолати вазнин қарор доранд.
Дар ҷаҳон аз рӯи шумораи одамоне, ки ба ин вирус мубтало шудаанд, ИМА дар ҷои аввал қарор дорад. Теъдоди мубталоён дар Иёлоти Муттаҳида 188 578 нафарро ташкил медиҳад.
Италия дар ҷои дуюм буда, дар он то имрӯз 105 792 ҳолат ба қайд гирифта шудааст. Италия мамлакати аврупоиест, ки дар он шумораи фавти баланд аз коронавирус ба қайд гирифта шуда, он 12 428 нафарро ташкил медиҳад.
Испания аз рӯи шумораи сироятёфтагон дар ҷои сеюм қарор гирифта, дар он 95 923 нафар мубталои коронавирус шудаанд.
Шумораи зиёди сироятҳо ҳамчунин дар Чин — 81 518, Германия — 71 808, Франсия — 52 128, Эрон — 44 605, Британияи Кабир — 25 150, Швейтсария — 16 605, Туркия – 13 531, Белгия – 12 775, Нидерланд – 12 595, Австрия – 10 180, Кореяи Ҷанубӣ — 9 887 ва Канада – 8 612 ба қайд гирифта шудааст.
Аз ҳама бештар дар Чин — 76 052 нафар, Испания — 19 259, Германия — 16 100, Италия — 15 729, Эрон — 14 656, Франсия — 9 444, ИМА — 7 251, Кореяи Ҷанубӣ — 5 567, Швейтсария — 1 823 ва Белгия — 1 696 нафар беморон шифо ёфтаанд.
Ба даҳгонаи давлатҳое, ки дар онҳо теъдоди зиёди ҳолатҳои фавт ба қайд гирифта шудааст, Италия (12 428 нафар), Испания (8 464), ИМА (3 890), Франсия (3 523),Чин (3 305), Эрон (2 898), Британияи Кабир (1 789), Недерланд (1 039), Германия (775) ва Белгия (705) дохил мешаванд.
СУТ, ки 11 март хуруҷи COVID-19-ро пандемия эълон карда буд, имрӯз дар бораи беш аз 200 кишвару ҳудуд ва ду киштии саёҳатии байналмилалии «Diamond Princess» ва «MS Zaandam», ки дар онҳо ҳолатҳои сироятёбӣ ба қайд гирифта шудаанд, гузориш медиҳад.
