ДУШАНБЕ, 2 фев — Sputnik. Санъат Раҳим, ҳафтаи равон зимни нишасти матбуотӣ дар Душанбе гуфт, соли гузашта дар иншооти кишвар 259 назорати техникӣ , аз ҷумла 241 назорати нақшавӣ ва 18 ғайринақшавӣ гузаронда шуд.
"Барои ба талаботи санадҳои меъёрии ҳуқуқӣ ҷавобгӯ набудани фаъолият, наандешидани чораҳои зарурӣ ҷиҳати пешгирии ҳодисаҳои нохуш дар иншооти истеҳсолии хатарнок ба 67 корхона оид ба боздошти кор супориш дода шуд", - хабар дод нашрияи парлумонии “Садои мардум” аз қавли Санъат Раҳим.
Манбаъ афзуд, шахсони масъул ба ҷавобгарӣ кашида шуда, ба маблағи 653 ҳазору 380 сомонӣ ҷаримабандӣ гардиданд. Аз 1571 корманди муҳандисию техникии корхонаҳо, ки мавриди санҷиши касбият қарор гирифтаанд, 273 нафарашон аз санҷиш нагузаштанд.
Ба иттилои Хадамот, соли сипаришуда 33 ҳодисаи нохуш ва 3 садамаи истеҳсолӣ ба қайд гирифта шуд, ки дар натиҷа, 20 нафар ҳалок гардида, 25 кас ҷароҳати ҷисмонӣ бардоштанд.
