ДУШАНБЕ, 16 янв — Sputnik. Аҳзоби сиёсӣ 70 нафарро тариқи рӯйхати ҳизби ба ҳавзаи ягонаи умумиҷумҳуриявӣ пешниҳод кардаанд.
Омори ҳавзаи якмандата то ба ҳол ниҳоӣ нашудааст, аммо бино ба додаҳои аҳзоби сиёсӣ, аз ин ҳавза 64 нафари дигар пешниҳод шудаанд. Теъдоди афроде, ки аз роҳи худпешбарӣ ва ё муассисаву созмонҳо пешниҳод шудаанд, то ба ҳол дақиқ нашудааст.
Носирҷон Салимӣ, узви Комиссияи марказии интихобот ва раъйпурсии Тоҷикистон (КМИР) ба Sputnik Тоҷикистон гуфт, аҳзоби сиёсӣ то 15 сентябр номзадҳои худро аз рӯйхати ҳизбӣ барои ҳавзаи умумиҷумҳуриявӣ пешниҳод кардаанд ва баррасии ҳуҷҷату асноди онҳо то 9 феврали соли равон идома меёбад.
"Ҳар номзаде, ки таъйиди КМИР-ро мегирад, аз ҳамон рӯз ҳаққи шурӯъи маъракаи пешаинтихоботии худро ба даст меорад. КМИР баррасии аснодро пас аз такмил шудани онҳо аз сӯи аҳзоби сиёсӣ шурӯъ мекунад", - гуфт Салимӣ.
Тибқи иттилои КМИР, Ҳизби аграрӣ – 13, Ҳизби демократ – 4, Ҳизби ислоҳоти иқтисодӣ – 7, Ҳизби коммунист – 7, Ҳизби сотсиал – демократ – 5, Ҳизби сотсиалист – 6 ва Ҳизби халқӣ – демократӣ - 28 нафарро аз рӯйхати ҳизбӣ ба ҳавзаи умумиҷумҳуриявӣ пешниҳод намудаанд.
Президент барканор карду ба вакилӣ пешбарӣ шуд: Азиззода дар интихобот иштирок мекунад
Аҳзоби сиёсии Тоҷикистон ба Sputnik Тоҷикистон омори номзадҳои худро аз ҳавзаи якмандата низ ироа доштанд, аммо гуфтанд, эҳтимол дорад, ин арқом тағйир ёбанд.
Бино ба маълумоти аҳзоб, дар ҳоли ҳозир Ҳизби аграрӣ – 5, Ҳизби демократ – 8, Ҳизби ислоҳоти иқтисодӣ – 6, Ҳизби коммунист – 1, Ҳизби сотсиалист – 3 ва Ҳизби халқӣ – демократӣ - 41 нафарро дар ҳавзаи якмандата вориди сабқатҳои интихоботӣ хоҳанд кард.
Тибқи Қонуни интихоботи Тоҷикистон, аҳзоби сиёсӣ сари ҳар номзад аз ҳарду ҳавза бояд 100 нишондод ё ба ҳисоби имрӯз 5 800 сомонӣ гарави интихоботӣ пардохт кунанд.
Дар Душанбе дар рӯзи интихоботи парлумонӣ 70 адад ҳавзаҳои интихоботӣ таъсис дода мешавад
Бино ба ин қонун, агар ҳизби сиёсӣ аз 10% ва номзад аз 5% раъйи бештар ба даст орад, гарави интихоботиро бозпас мегирад, дар акси ҳол, ин маблағ баргардонида намешавад. Бино ба ин қонун, 65% аъзои Маҷлиси намояндагон ё 41 нафар аз ҳавзаҳои якмандатӣ ва 35% ё 22 нафар аз ҳавзаи ягонаи умумиҷумҳуриявӣ соҳиби курсиҳои парлумон хоҳанд шуд.
Дар интихоботи парлумони соли 2015 барои курсиҳои Маҷлиси намояндагони Тоҷикистон 285 номзад, дақиқан 103 нафар аз рӯйхати ҳизбӣ ва 182 нафар, ба шумули 80 нафари тариқи худпешбарӣ вориди сабқат шуда буданд.
Дар охирин лаҳзае, ки ин гузориш омода мешуд, дар тамос бо Sputnik Тоҷикистон масъулини Кумитаи марказии интихобот ва раъйпурсӣ гуфтанд, ки теъдоди муддаиёни курсиҳои парлумон аз ҳавзаҳои якмандата, бахусус номзадҳои мустақил дақиқ нашудааст.
Интихоботи парлумонии Тоҷикистон 1 марти соли равон баргузор мешавад.
