ДУШАНБЕ, 25 дек — Sputnik. Аз 1 то 15 октябри соли 2020 дар пойтахти Тоҷикистон маъракаи барӯйхатгирии аҳолӣ ва фонди манзил гузоронида мешавад, иттилоъ додааст дафтари матбуоти раиси шаҳри Душанбе.
Тибқи қарори раиси шаҳри Душанбе сарраёсати Агентии омори назди Президенти Ҷумҳурии Тоҷикистон дар шаҳри Душанбе вазифадор гардидааст, ки дар ҳамкорӣ бо сохторҳои дахлдор барои дар муҳлатҳои муайянгардида гузаронидан, коркард, ҷамъбаст ва таҳлили натиҷаҳои барӯйхатгирии аҳолӣ ва фонди манзил дар пойтахт тадбирҳои таъхирнопазир андешад.
Ҳамчунин муовинони Раиси шаҳри Душанбе ва раисони ноҳияҳои пойтахт муваззаф гардидаанд, ки ҷиҳати дар сатҳи баланд ташкил намудан, гузаронидани барӯйхатгирии аҳолӣ ва фонди манзили шаҳри Душанбе тадбирҳои зарурӣ андешанд.
Ёдрас мешавем, тибқи Фармони Президенти Тоҷикистон аз 30 сентябри соли 2019 дар ҷумҳурӣ барўйхатгирии навбатии аҳолӣ ва фонди манзил дар давраи аз 1 то 15 октябри соли 2020 гузаронида мешавад.
Барӯйхатгирии аҳолӣ ва фонди манзили Тоҷикистон соли 2020 15 рӯз идома ёфта, пурсишҳо бо се тарз-яъне пур кардани варақаҳои барўйхатгирӣ бо истифода аз сомонаи интернетӣ, истифода аз планшет дар ҳамаи маҳалҳои шаҳрии ҳудуди ҷумҳурӣ ва усули анъанавии пур кардани саволномаҳо дар варақаҳо дар маҳалҳои деҳот сурат мегирад.
