ДУШАНБЕ, 1 дек — Sputnik. Бино бар иттилои дафтари матбуоти ҳукумати вилояти Суғд, дар ноҳияи Спитамен мулоқоти роҳбарияти ноҳия бо фаъолони ноҳия баргузор шуд, ки дар он вазъи мубориза бо амалҳои номатлуб, пешгирии терроризму экстремизм ва қочоқи маводи мухаддир мавриди баррасӣ қарор гирифт.
Манбаъ таъкид намудааст, ки муовини раиси ноҳия Дилрабо Раҳимӣ зимни мулоқот дар бораи пешгирии шомилшавии бархе аз шаҳрвандон ба ҳизбу ҳаракатҳои террористиву экстремистӣ, фаъолияти масъулини ҷамоатҳо дар ин самт, ислоҳи камбудиҳои ҷойдошта, ҷоннок намудани корҳои тарғиботиву ташвиқотӣ ва дигар масъалаҳои мубрами ҷомеа гузориш дод.
Ҳамзаомн манбаъ қайд намудааст, ки прокурори ноҳия Ҳусейнзода Улфат Умед, муовини сардори ШВКД Тоҷикистон дар ноҳия Азимзода Меҳваршоҳ ва дигар масъулин низ доир ба роҳҳои пешгирӣ аз ин амалҳои номатлуб андешаҳои худро баён намуданд.
“Дар охири кори ҷаласа раиси ноҳия перомуни масъалаҳои баррасишуда вазифагузорӣ намуда, барои дар сатҳи баланд ҷашн гирифтани 30-солагии Истиқлолияти Тоҷикистон ва вусъат бахшидан ба корҳои ободониву бунёдкорӣ ба масъулини соҳаҳои дахлдор дастуру супоришҳо дод”, -таъкид намудааст дафтари матбуоти ҳукумати вилояти Суғд.
