ДУШАНБЕ, 23 сен — Sputnik. Тибқи иттилои Кумитаи миллии олимпии Тоҷикистон, рӯзи 21 сентябр дастаи “Хатлон”-и шаҳри Бохтар дар майдони худ бар тими “Панҷшер” бо ҳисоби 4:0 ғалаба кард.
Кумита дар тавзеҳи бозии тимҳои “Панҷшер” ва “Хатлон” изҳор доштааст, ки голҳои тими Бохтарро Абдухалил Боронов - 2 гол, Парвиз Охунов ва Умарҷон Шарифов ба ҳада расонданд.
Бозии КМВА “Помир” бо “Куктош” мусовӣ бо ҳисоби 1:1 анҷом ёфт. Ба голи задаи футболбози дастаи ноҳияи Рӯдакӣ Азизбек Султонов дар нимаи аввал, тими артиш, Шодибек Ғаффоров бо як гол посух дод.
Натиҷаи мусовии “Куктош” сабаб шуд, ки “Хатлон” бо 22 хол аз 16 бозӣ ба ҷои сеюми ҷадвали чемпионат барояд.
Инчунин рӯзи 22 сентябр тими “Истиқлол” дар майдони худ ба дарвозаи тими “Истаравшан” 2 голи беҷавоб зад. Голҳоро Шериддин Бобоев ва Аҳтам Назаров ба ҳадаф расониданд. Дар бозии дигар “Хуҷанд” бар “Регар-ТадАЗ” бо ҳисоби 1:0 пирӯз шуд. Голи ягонаро Турсуналӣ Рустамов ба номаш сабт кард.
Ба панҷгонаи тимҳои пешсафи чемпионат то ҳол “Истиқлол” бо 42 хол, “Хуҷанд” бо 26 хол, “Хатлон” бо 22 хол, “Куктош” бо 20 хол ва “Регар-ТадАз” бо 19 хол қарор доранд.
