ДУШАНБЕ, 18 сен — Sputnik. Душанбе дар соли 2021 Пойтахти фарҳангии Иттиҳоди Давлатҳои Мустақил (ИДМ) мешавад. Дар ин бора имрӯз дар ҷаласаи 34-уми Шӯрои ҳамкории фарҳангии кишварҳои узви ИДМ, ки дар толори Китобхонаи миллии Тоҷикистон ба кори худ оғоз бахшид, хабар дода шуд.
Бояд зикр намуд,ки мақоми 2Пойтахти фарҳангии ИДМ" ба ин ё он шаҳр бо қарори Шӯрои сарони давлатҳои ИДМ дода мешавад. Чунин мақом ба пойтахти Тоҷикистон тибқи қарори Шӯрои сарони давлатҳои ИДМ моҳи сентябри соли 2018 дода шудааст.
Ҳамзамон Шӯрои сарони давлатҳои ИДМ соли 2021-ро дар қаламрави Иттиҳоди Давлатҳои Мустақил соли меъморию шаҳрсозӣ эълон кардааст.
Душанбе метавонад пойтахти фарҳангии кишварҳои ҳамсуд шавад
Ёдовар мешавем, ки Барномаи байнидавлатии "Пойтахтҳои фарҳангии ИДМ" соли 2011, ки соли мероси таърихию фарҳангии ИДМ эълон гардида буд, таҳия ва қабул шудааст. Ҳадафи он – рушди ҳамкорӣ ва муттаҳидсозии зарфиятҳои фарҳангии кишварҳои узви ИДМ мебошад.
Бо қарорҳои дахлдори Шӯрои сарони давлатҳои ИДМ соли 2012 шаҳри Остона ва шаҳри Марв , соли 2013 шаҳрҳои Габалаи Озарбойҷон, Гумрии Арманистон ва Могилёви Беларус, соли 2014 Алмаато ва Ӯш , соли 2015 шаҳрҳои Воронежи Россия ва Кӯлоби Тоҷикистон, соли 2016 шаҳри Тошҳавзи Туркманистон, соли 2017 шаҳри Ганҷаи Озарбойҷон, соли 2018 шаҳри Ҳориси Арманистон, соли 2019 шаҳри Брести Белорус ва соли 2020 шаҳри Чимкенти Қазоқистон Пойтахти фарҳангии ИДМ эълон гардидаанд.
