Дар Макка ду зоири тоҷик фавтид

ДУШАНБЕ, 15 авг - Sputnik. Аснои Ҳаҷ дар Арабистони Саудӣ ду зоир, ки шаҳрвандони Тоҷикистон буданд ба ҳалокат расиданд, хабар медиҳад агентии "Авеста" бо такя ба маълумоти сухангуйи Кумитаи дин, танзими анъана ва ҷашну маросимҳои Тоҷикистон.

Бар хабари манбаъ, зоирини тоҷик ҳар ду 70 сол доштанд ва бар асари сактаи қалбӣ ҷон аз даст доданд. Яке аз ҳалокшудагон сокини Ҳисор буда,  дигаре аз вилояти Суғд будаст. Ҷасади онҳоро дар Макка ба хок супориданд.

"Сомон Эйр": 3750 зоирин аз Тоҷикистон ба Ҷидда таҳвил ёфтанд

Маврид ба зикр аст, ки феълан барои адои маросими Ҳаҷ дар Арабистони Саудӣ милионҳо мусалмонон қарор доранд.

Давлатзода ба гурӯҳи нахустин зоирини озими ҳаҷ: дар Макка боодоб бошед

Тоҷикистон имсол 7000 квота барои зоирини тоҷик аз ҳукумати Арабистони Саудӣ дарёфт намуда буд.

Бино бар иттилои дафтари матбуоти Кумитаи дин, танзими анъана ва ҷашну маросимҳои Тоҷикистон, соли равон арзиши адои Ҳаҷ барои як нафар 35 ҳазору 128 сомониро ташкил хоҳад дод.

Ёдовар мешавем, ки қаблан расонаҳои Қирғизистон аз ҳалокати се зоири қирғиз хабар дода буданд, ки онҳо низ бар асари беморӣ ҷон аз даст доданд ва дар Макка ҷасади онҳо ба хок супорида шуд.

Имсол Арабистони Саудӣ барои зоирини Қирғизистон 6 010 даъватнома ирсол намуда буд.