ДУШАНБЕ, 23 июл — Sputnik. Дафтари матбуотии ВУД аз дастгир намудани марди 36-солае бо ҷурми таҳдиди куштан ва ё расонидани зарари вазнин ба саломатии инсон хабар додааст.
Ба ШВКД-1 дар ноҳияи Сино бо ариза марди 22-солаи сокини ноҳияи Ванҷ муроҷиат намудааст, ки рӯзи 21-уми июли соли 2019, тахминан соати 22:40-дақиқа, ҳангоми дар дохили тарабхонаи “Абрикол”-и шаҳри Душанбе қарор доштанаш “Оятулло” ном шахс дар ҳолати мастӣ корди хоҷагиро ба гарданаш гузошта, ӯро таҳдиди куштан намудааст.
Дар натиҷа, номбурда ҷароҳати ҷисмонӣ бардоштааст.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 36-солаи сокини ноҳияи Рӯдакӣ, бо гумони таҳдиди куштан ва ё расонидани зарари вазнин ба саломатӣ дастгир карда шуда, аз рӯи ин ҳодиса тафтишот идома дорад.
