ДУШАНБЕ, 23 июл — Sputnik. Рамазон Раҳимзода, вазири умури дохилаи Тоҷикистон, имрӯз зимни нишасти матбуотӣ эълон дошт, ки вазъ дар марзи Тоҷикистону Қирғизистон дар минтақаи Ворух ва Оқсой вазнин аст ва ҳоло мақомоти ду кишвар барои муътадил намудани вазъ машғул ҳастанд.
Вай афзуд, ки муноқиша дар минтақае сар задааст, ки таҳти назорати кормандони милитсияву марзбонон нест.
“Муноқишаҳо дар ҷойҳое сар мезанад, ки дар онҷо марзбонон нестанд. Дар ҳоли ҳозир, комиссия муштараки Қирғизистону Тоҷикистон фаъолият дорад, то онки вазъро омӯхта, муътадил созанд”, - таъкид кард вазир.
Расоиддин Тешаев, сокини кушташудаи Ворух шаҳрванди Русия буд
Дар ҳамин ҳол, Рамазон Раҳимзода, қайд намуд, ки барои таъмини амнияти шаҳрвандон тамоми чораҳо андешида шуда истодааст.
Вай инчунин, зикр кард, ки роҳ ҳоло бастааст, аммо мақомот барои озодона рафту омад кардани роҳ талош доранд.
Вазири умури дохилаи, зимни нишасти матбуоти тасдиқ кард, ки як корманди милитсияи Тоҷикистон дар муноқишаҳои ахир дар Ворух захмӣ гардидааст.
Вай гуфт, дар ҳоли ҳозир, вазорат барои расонидани кумак ба корманди милитсия кушиш дорад.
Раҳмон ва Жээнбеков дар Ворух масоили марзиро баррасӣ мекунанд
“Мо тамоми чораҳоро дида истодаем, ки кумак намоем. Ҳолат вазнин аст”, - гуфт Рамазон Раҳимзода Вазири корҳои дохилаи Тоҷикистон.
Ёдрас мешавем, ки, рӯзи 22 июли соли 2019 сокинони ҷамоати Ворухи шаҳри Исфара дар ҷараёни омодагиҳо ба сафари кории Эмомалӣ Раҳмон ба шаҳри Исфара ва мулоқоти ӯ бо Президенти Қирғизистон ба корҳои ободонӣ машғул гардида, дар симчуби ҳудуди ҷамоати Ворух парчамиТоҷикистонро овезон намуданд.
Тахминан соати 16:35 дақиқа, шаҳрвандони Қирғизистон монеа шуда, худсарона заминро кофта, навиштаҷоти "Оқсой" ва парчами кишварашонро насб карданд.
Ба гузориши КДАМ, азбаски шаҳрвандони Қирғизистон ин амали худро дар ҳудуди қаламрави Тоҷикистон анҷом доданд, сокинони Ворух ба онҳо мухолифат карданд. Дар натиҷа миёни сокинони ду кишвар муноқиша ба амал омад.
Бар асари тирпарронӣ 1 нафар шаҳрванди ҶТ сокини ҷамоати Ворух Қараев Ҷалол, соли таваллудаш 1967 ба ҳалокат расида, 3 нафари дигар маҷрӯҳ шуданд.
Инчунин, дар пайи сангпартоӣ 7 шаҳрванди ҶТ ҷароҳати вазнини ҷисмонӣ бардошта, ба беморхона интиқол ёфтанд.
КДАМ мегӯяд, маҳз дар остонаи вохӯрии сатҳи олии Сарони ду кишвари ҳамсоя дар шаҳри Исфара рух додани ҳодисаи мазкур шаҳодат медиҳад, ки баъзе аз доираҳои манфиатҷӯйи қирғиз сулҳу субот ва тинҷиву оромиро дар хати марз намехоҳанд ва ба иғвогарӣ даст мезананд.
