ДУШАНБЕ, 24 июн - Sputnik. Духтари Гулнора Каримова эълон намудааст, ки пулҳои модараш дар ҳаҷми 1,2 миллиард доллар ба хазинаи давлат баргардонида шудааст.
Духтари Гулнора дар Instagram хабареро интишор намудааст, ки гӯё худи Гулнора Каримова навишта аст.
Иман Каримова ин хабарро дар истинод ба саҳифаи @gulnarakarimovaupdates интишор намудааст. Дар ҳоли ҳозир ин саҳифа дастрас нест.
“Ин аввалин муроҷиати ман дар 6 соли ахир аст. Ман аз ному насабе, ки дорам масъулият эҳсос намудам ва ман вақт доштам ба рафтори худ хуб фикр кунам”, - шурӯъ кардааст Гулнора.
Духтари собиқ раисҷумҳури Узбакистон Ислом Каримов афзудааст, ки дар солҳои ахир хуб тағйир кардааст ва ҳоло метавонад барои кирдорҳои пешинаш худро маҳкум намояд.
“Ман мехоҳам эълон намоям, ки пулҳои шахсии ман, ки дар ҳудуди Узбакистон буданд, аз ҳисоби ман бароварда шуданд ва ҳоло барои беҳбудии кишвар равона шудааст”, - гуфт вай.
Инчунин Гулнора қайд намудааст, ки бо мақомоти ҳифзи ҳуқуқи кишвар ҳамкорӣ дорад.
“Ман назди мардум ва он нафароне, ки ба ман эҳтиром доштанд ва мушкилоти маро дарк кардан пузиш мехоҳам. Ман ҳамчунин пузиш мехоҳам, ки онҳоро ноумед сохтам”, - илова кардааст Каримова.
Гулнора Каримова умедвор аст, ки миллионҳо доллари ӯ ба рушди Узбакистон, аз ҷумла лоиаҳои гуманетарӣ равона хоҳанд шуд.
Дар ҳамин ҳол мақомоти расмии Узбакистон хабари мазкурро расман шарҳ надодааст.
Ёдовар мешавем, ки дар соли 2015 Каримова зери ҳабс қарор гирифт. Додгоҳ ӯро бо ҷурми ришваситонӣ ва насупоридани боҷи давлатӣ ба муҳлати 5 сол ҳабси хонагӣ карда буд. Ғайр аз ин то ҳол тафтишоти парвандаи ҷиноии Каримова аз рӯи дигар амалҳои ҷиноӣ идома дорад.
Бояд қайд кард, ки дар моҳи декабри соли 2017 Вазорати молияи Амрико номи Гулнораро ба рӯйхати таҳримшудагон оид ба “қонуни глобалии Магнитский” ворид карда буд.
Он вақт Вазорати молия тасдиқ карда буд, ки Каримова ташкилоти ҷиноии “синдикат”-иеро роҳбарӣ мекардааст.
