ДУШАНБЕ, 16 июн — Sputnik. Маҷлиси миллӣ бо пешниҳоди Эмомалӣ Раҳмон, раисиҷумҳури Тоҷикистон Акрамов Аҳтам Маҳрамовичро аз вазифаи додраси Додгоҳи олӣ бозхонд кард. Котиботи раисиҷумҳур далели бозхонд намудани Акрамовро ба бемории тӯлонияш рабт дода буд, ки “бо сабаби вазъи саломатӣ муддати дароз вазифаҳои худро иҷро карда натавонист”.
Инчунин бо ҷонибдории аъзои парлумон Лутфуллозода Шавкат аз вазифаи додраси Додгоҳи олӣ бозхонд шуда, муовини якуми раиси Додгоҳи олии Тоҷикистон таъин гардид.
Давлатзода Хусрав Лутфулло, ки бо фармони Эмомалӣ Раҳмон аз вазифаи муовини раиси суди ҳарбии гарнизони Душанбе барканор шуд, бо ҷонибдории Маҷлиси миллӣ додраси Додгоҳи олӣ интихоб шуд.
Раҳмонзода Маҳмад Шариф, собиқ додраси додгоҳи шаҳри Душанбе додраси Додгоҳи олии Тоҷикистон интихоб шуд.
Ҳаким Рухшона Аскар, ки 11 июни соли равон бо сабаби ба кори дигар гузаштан аз вазифаи судяи Суди шаҳри Душанбе озод шуда буд, бо ҷонибдории Маҷлиси миллӣ додраси нави Додгоҳи олии Тоҷикистон интихоб гардид.
