ДУШАНБЕ, 13 июн — Sputnik. Зани 22-солаеро дар Истаравшан ҳангоми ба корҳои саҳроӣ машғул буданаш ба қатл расониданд, хабар медиҳад Вазорати умури дохилаи Тоҷикистон.
Бино бар иттилои манбаъ, ба гумони куштори зани ҷавон марди 25-солаи сокини деҳаи Зарнисори шаҳри Истаравшан ҳамчун гумонбар дар содир намудани ҷинояти одамкушӣ дастгир карда шуд.
"Номбурда, рӯзи 12-уми июни соли 2019, тахминан соати 08:00, дар заминҳои хоҷагии деҳқонии "Ҷ.Мирамин", воқеъ дар ҳудуди деҳаи Ясии ҷамоати деҳоти Гули Сурх бо зани 22-солаи сокини деҳаи Ясси, ки бо корҳои хоҷагӣ машғул буд, ҷангу ҷанҷол карда, бо мақсади ба қатл расонидан, ӯро бо дастонаш буғӣ кардаааст", - менависад ВУД Тоҷикистон.
Дар натиҷа зан ба ҳалокат расидааст.
Аз рӯи ин ҳодиса парвандаи ҷиноятӣ оғоз гардида, тафтишот идома дорад.
