ДУШАНБЕ, 4 июн — Sputnik. Ахиран Вазири фарҳанги Тоҷикистон Шамсиддин Орумбекзода бо Сафири фавқуллода ва мухтори Ҷумҳурии Исломии Эрон дар Тоҷикистон Муҳаммадтақии Собирӣ вохӯрӣ анҷом дод, иттилоъ додааст дафтари матбуоти Вазорат.
Бино бар иттилои манбаъ, зимни мулоқот тарафҳо доир ба таҳкими робитаҳои фарҳангӣ байни Эрон ва Тоҷикистон, таҳия ва ба имзорасонии созишномаи нави ҳамкории фарҳангӣ сӯҳбат намуданд.
Аз ҷумла манбаъ таъкид намудааст, ки ташкил ва иштироки ҳар ду кишвар дар чорабиниҳои муштараки адабию фарҳангӣ, конфронсу семинарҳо, баргузории Рӯзҳои фарҳанги ҳар ду кишвар, иштирок дар намоишгоҳҳои китобӣ мавриди муҳокима қарор гирифтанд.
Манбаъ зикр намудааст, ки сӯҳбат дар фазои хушу хотирмон сурат гирифт.
