ДУШАНБЕ, 30 май — Sputnik. Пажуҳишгоҳи таҳлили иҷтимоии Академияи хоҷагии қишлоқ ва хизмати давлатии назди раисиҷумҳури Русия дар пайи як таҳқиқот изҳор доштааст, ки ба ҳолати 1 майи соли 2019 таъдоди тоҷикистониён, ки муваққатан дар Русия қарор доранд, 1 миллиону 255 ҳазор нафарро ташкил медиҳад.
Ба иттилои манбаъ, соли 2014 ин нишондод ба 1 миллиону 137 ҳазор нафар баробар буд.
Пажуҳишгарон мегӯянд, тайи соли гузашта теъдоди муҳоҷирон аз Тоҷикистон дар Русия 171 ҳазор нафар, аз Узбакистон – 173 ҳазор ва аз Қирғизистон – 73 ҳазор нафар афзоиш ёфтаанд.
Пажуҳишгоҳ таъкид кардааст, ки дар маҷмуъ ба ҳолати 1 майи соли равон дар қаламрави Русия 9,8 миллион хориҷӣ қарор доштаанд, ки 86 дарсади онҳоро шаҳрвандони кишварҳои ИДМ ташкил дода, аз ин шумора 4,1 миллион нафар муҳоҷирони меҳнатӣ мебошанд.
Инчунин манбаъ аз афзоиши патентгирӣ хабар дода, таъкид намудааст, ки даромад аз ҳаққи патент нисбати соли гузашта коҳиш ёфтааст.
“Ин ба он рабт дорад, ки муҳоҷирон ҳангоми сафар ба Русия патент мегиранд, аммо баъди моҳи якум ҳаққи онро пардохт намекунанд”, - изҳор доштаанд пажуҳишгарон.
Эмомалӣ Раҳмон, раисиҷумҳури Тоҷикистон моҳи апрели соли равон дар Маскав аз коҳиши вуруди муҳоҷирони меҳнатии тоҷик ба Русия хабар дод. Ҳамтои русиягияш Владимир Путин изҳор дошт, ки феълан дар Русия 1,2 миллион тоҷикистонӣ фаъолият доранд.
