ДУШАНБЕ, 1 апр - Sputnik. Тибқи иттилои Шабакаи рушди Оқохон, ҷоизаҳоро дар шаҳри Лисабон Оқохони IV , Марселу Ребелу Ди Соуза, раисиҷумҳури Португалия ва шоҳзода Амин Оқохон ба барандаҳо супориданд. Мукофотпулии ҷоиза 500 ҳазор доллари амрикоӣ ташкил медиҳад, ки миёни барандаҳо тақсим мегардад.
Ҷоизаи мусиқии Оқохон дар бахши нигоҳдорӣ, эҳё ва оммависозиро, ки Осорхонаи ба номи Гурминҷ Завқибеков соҳиб шуд, ба Иқбол Завқибеков, навозандаи тоҷик ва писари марҳум Гурминҷ Завқибеков, таъсисдиҳандаи ин осорхона супориданд.
Инчунин Фарҳод Ҳалимов, овозхон ва ғижжаку танбурнавози тоҷики зодаи Самарқанд, ки мақомсароӣ мекунад, Ҷоизаи мусиқии Оқохон дар бахши нигоҳдорӣ, эҳё ва оммависозиро соҳиб шуд.
Президенти Португалия дар хитоб ба ҷоизадорон гуфт, мо ва шумо имрӯз дар бораи сулҳ дар ҷаҳон, гуногунӣ, муколама ва муборизаи муштарак бо таҳаммулнопазирию таассуб меандешем ва мусиқӣ шеваи хубест, барои анҷоми ин корҳо.
Оқохони IV дар маросими ҷоизасупорӣ аз таҳаввулоте, ки неруҳои технологӣ ба ҷаҳони мо ворид мекунанд, зикр намуда, афзуд, дар ҷаҳони муосир афроде, ки дар канори дигари сайёра иқомат доранд, ба андозаи ҳамсояамон дар як хиёбон ба мо наздиканд. Оқохони IV дар ҷаҳони муосир зарур донист, ки барои сулҳу пешрафт аҳдофи плюралистӣ ва ахлоқи ҷаҳоншумул таблиғ гарданд. Ӯ ҳадафи ҷоизаи таъсисдодаашро як навъ саҳмгузорӣ дар амалишавии ин аҳдоф хонд.
Ҷоизаи Оқохонро намояндаҳои кишварҳои гуногуни ҷаҳон соҳиб шуданд.
Аз ҷумла дар бахшҳои санъати оҳангсозӣ ба Фарангиз Ализода, оҳангсозу пианист аз Озарбойҷон, дар бахши фаъолияти маърифатӣ ба ансамбли “Омнибус”, гуруҳи мусиқичиҳо аз Тошканд, дар бахши мушорикати иҷтимоӣ ба оҳангсозу овозхон Бадиа Боруизӣ аз Тунис ҷоиза дода шуд. Ҷоиза дар бахши саҳмгузории бисёрсола дар рушди санъати мусиқиро Уму Сангаре, овозхону оҳангсоз аз Малӣ, Баллаке Сиссоко, оҳангсоз аз Малӣ ва Дориюш Талай, мусиқишинос ва навозандаи тору сетор аз Эрон ба даст овардаанд. Ҷоиза дар бахши иҷроишро Мустафо Саид, овозхон аз Миср соҳиб шуд.
Қаблан Оқохони IV ба суоли маҷаллаи маъруфи “La Cohorte” дар мавриди таъсиси ҷоиза дар умури мусиқӣ гуфт, ба ҳамин восита мехоҳад, дар бораи санъати мусиқии кишварҳои рӯй ба рушд мардуми бештаре дар ҷаҳон огоҳӣ пайдо кунанд.
