ДУШАНБЕ, 30 мар - Sputnik. Кишвардори Тоҷикистон Эмомалӣ Раҳмон ба 10 хонаводаи камбизоат дар Хуҷанд манзили 2-3-ҳуҷрагӣ ҳадя кард. Бино ба гузориши дафтари матбуоти раисҷумҳур, ин ҳадяҳо барои сокинон ғайриинтизор буд, онҳо аввал шигифтзада ва сипас аз президент миннатдор гардиданд.
Афзун бар ин, дар ин маросим Эмомалӣ Раҳмон ба 100 нафар ятими кулл, ки таълимгирандагону донишҷӯёни муассисаҳои миёнаву олии шаҳри Хуҷанд мебошанд, туҳфаҳои идона тақдим намуданд.
"Қобили зикр аст, ки туҳфаҳои идонаи Пешвои миллат аз сару либоси мавсимӣ, аз ҷумла шиму кастюм, ҷӯробу пойафзол, курта ва шириниҳои гуногуни наврӯзӣ иборат буданд", - менависад дафтари матбуотӣ.
Ҳамчунин дар ин рӯз ба хотири шодию нишоти ятимон дастурхони идона ороста шуда, ба ҳар яки онҳо аз ҷониби кишвардор маблағҳои пулӣ тақдим карда шуд.
Бино ба иттилои оморӣ, то имрӯз дар вилояти Суғд 467 нафар ятими кулл ба қайд гирифта шудаанд, ки зери таваҷҷуҳи бевоситаи роҳбарияти олии сиёсии кишвар қарор доранд ва барои онҳо шароити муосири таълимиву илмомӯзӣ муҳайё гардидааст.
