ДУШАНБЕ, 27 ноя — Sputnik. Тибқи иттилои ВУД, алайҳи Одинаев барои даъвати оммавӣ ба фаъолияти экстремистӣ парвандаи ҷиноӣ оғоз гардида буд.
“Одинаев Тошалӣ дар саҳифаҳои интернетӣ ба ҳайси модератор фаъолият намуда, зидди сохти конститутсионӣ паҳн ва нашри ҳар гуна матолиби чопию аудиовизуалии марбут ба "Гурӯҳи 24"-ро ҷонибдорӣ мекард”, - омадааст дар гузориши ВУД.
Худи Одинаев дар навори нашркардаи ВУД изҳор медорад, ки аз соли 2014 дар муҳоҷирати меҳнатӣ ба кори сохтмону мусофирбарӣ машғул будааст. Одинаев афзуд, ки аз соли 2016 то 2018 шомили созмони “Гуруҳи 24” шуд ва фоидае надида бо ихтиёри худ ба Ватан баргаштааст, то хизмати падару модар кунад.
Рӯзи гузашта ВУД аз бозгашти ихтиёрии Ахмедов Мирзоҳаким хабар дода буд, ки ӯ ҳам барои узвият дар “Гуруҳи 24” таҳти пайгард қарор доштааст.
