ДУШАНБЕ, 23 ноя — Sputnik. Тибқи изҳороти вазири умури хориҷӣ, ҳангоми ошӯби шаби 8 ноябр дар зиндони Хуҷанд, 21 маҳбус безарар гардонида шуд, ки бештарашон барои терроризм маҳкум шуда буданд.
Ӯ изҳор дошт, ки нахуст масъулини зиндон маҳбусонро ба гуфтушунид даъват карданд, аммо онҳо муқобилият нишон дода, гуруҳе аз онҳо қасди фирор кардааст.
"Онҳо муқобилият нишон дода, чанд тан кӯшиши фирор кардааст. 12 маҳбуси кушташуда дар ҷангҳои Ироқу Сурия ба ҷонибдорӣ аз ДОИШ иштирок карда буданд ва се тани дигар узви гуруҳҳои тундрави "Ансоруллоҳ", "Ҷундуллоҳ"-у Ҳаракати исломии Узбакистон буданд. Боқӣ бо ҷурми куштор ва қочоқи маводи мухаддир дар ҳаҷми калон аз озодӣ маҳрум буданд", - иттилоъ додааст хадамоти хабарии Осиёи Марказӣ аз қавли Сироҷиддин Муҳриддин.
Ба иттилои вазир зимни ин ошӯб ду корманди зиндон кушта шуда, панҷ посбони дигар дар ҳолати вазнин ба беморхона интиқол ёфтаанд.
Суҳбати вазири умури хориҷии Тоҷикистон дар бораи ошӯби зиндни Хуҷанд дар ҳошияи нишасти вазирони умури хориҷии Осиёи Марказӣ ва Иттиҳоди Аврупо нахустин шарҳи расмии мақомдорони Тоҷикистон аст, ки дар бораи ин қазия баён карда мешавад.
Қаблан расонаҳо бо истинод ба манобеияшон шумораи кушташудаҳоро ҳудуди 50 нафар гуфтанд.
Ду ҳафта баъд аз ошӯб дар зиндони Хуҷанд, Эмомалӣ Раҳмон, раисҷумҳури Тоҷикистон, генерал Изатулло Шарифзодаро аз мақоми сардори Сарраёсати иҷрои ҷазои ҷиноятии Вазорати адлия барканор карда, ба ҷояш Умаров Мансурҷон Ғаффорович, собиқ ноиби аввали раиси КДАМ-ро таъин кард.
Сабаби расмии барканории Шарифзода аз роҳбарии идораи зиндонҳо баромадан ба нафақа гуфта шудааст.
Инчунин ахиран хабар дода шуд, ки дар робита ба ин ҳодиса 7 корманди маҳбас бо шумули сардори он Файзулло Сафарзода ва сардори бахши низомии зиндон Фарҳод Садировро боздошт карданд.
Вазири умури хориҷии Тоҷикистон дар нишасти хабарии Брюссел таъкид намудааст, ки исён дар зиндони Хуҷандро гуруҳи махсуси Додситонии кулли кишвар тафтиш дорад.
