ДУШАНБЕ, 5 окт — Sputnik. Қарзи берунаи Тоҷикистон сари ҳар сокин 320 доллари амрикоиро ташкил медиҳад, иттилоъ додааст хабаргузории ТоҷикТА.
Ин нишондод бо назардошти теъдоди аҳолии Тоҷикистон - беш аз 9 миллион нафар ва ҳаҷми қарзи хориҷӣ дар моҳи июли соли 2018 - 3 миллиард доллари амрикоӣ ироа шудааст.
Тибқи иттилои Вазорати молияи Тоҷикистон, дар ҷамъбасти нимсолаи аввал қарзи хориҷии Тоҷикистон ба 38,9 дарсади ММД баробар шуда, барои таъминоти он 90,6 миллион доллар сарф шудааст.
Қаблан иттилоъ дода шуд, ки солҳои 2018-2020 давраи асосии баргардонидани қарзҳои хориҷии кишвар мебошад. Маҳдудаи 40 дарсадӣ ҳангоми гирифтани қарзи хориҷӣ феълан риоя шуда истодааст.
Бино ба маълумоти Бонки ҷаҳонӣ, Тоҷикистон азм дорад, ки ҳадди ниҳоии қарзҳои хориҷиро аз 40%-и ММД ба 60% боло барад.
Дар нимсолаи аввали соли 2018 Тоҷикистон 8 созишномаи қарзию грантӣ ба маблағи 267,5 миллион долларро ба имзо расонд, ки 153 миллион доллар грант ва 114,2 миллион доллар қарз мебошад.
Вазорати молияи Тоҷикистон изҳор доштааст, ки дар солҳои 2018-2019 танҳо грантҳои созмонҳои молиявии байналмилалӣ, аз ҷумла Бонки ҷаҳониро ҷалб хоҳад кард.
Қаблан ожонси “Fitch Ratings” ба далели сатҳи баланди қарзи хориҷӣ Тоҷикистонро аз нигоҳи сиёсӣ осебпазир баҳогузорӣ карда, махсусан таҳдиди осебпазирӣ дар муносибат бо Чин – қарздиҳандаи асосии Тоҷикистонро зикр кард.
