ДУШАНБЕ, 3 май — Sputnik. Ҳавопаймои Су-30СМ рӯзи панҷшанбе ҳангоми парвоз аз пойгоҳи низомии Хмеймими Сурия суқут кард. Ҳардуи сарнишинон дар паи ин ҳодиса ҷон бохтанд, хабар медиҳад Вазорати дифоъи Русия.
"Соати 11:45 (бо вақти Душанбе) ҳангоми оғози парвоз аз пойгоҳи низомии Русия дар Сурия-Хмеймим ҷангандаи Су-30СМ дар болои баҳри Миёназамин суқут кард. Ҳардуи сарнишинон дар ҷои ҳодиса ҳалок шуданд", — омадааст дар хабарнома.
Қайд мешавад, ки "ба ҳавопаймо ҳуҷум накардаанд".
Бино ба маълумоти пешакӣ сабаби суқут ворид шудани парранда ба муҳаррики ҳавопаймо шудааст.
Пештар хабар дода шуд, ки ҳавопаймои низомии Сурия суқут кардааст.
Наҷотдиҳандагони Туркия 500 метр дуртар аз пораҳои ҳавопаймо сарнишини 56-солаи ин киштии ҳавоӣ-Муҳаммад Субҳонро зинда ёфтаанд.
Ба гуфти сарнишин ӯ барои ҳуҷум ба ҷангиён дар Идлиб аз Латакия парвоз кардааст. Ҳангоми иҷрои вазифа ҳавопаймои ӯро задаанд.
