ДУШАНБЕ, 18 мар — Sputnik, Азамат Шокиров. Дар Тоҷикистон интихоботи раисҷумҳури Федератсияи Русия мегузарад.
Имрӯз дар назди бинои маркази "Россотрудничество"-и шаҳри Душанбе навбати дурударозе саф кашида буд. Баъзеҳо барои овоз додан бо аҳли оилашон омада буданд. Кӯдакон либосҳои нав ба бар кардаву, ин ҷо фазои ҷашни воқеӣ ҳукмфармо буд.
"Ин як ид аст — интихоботи раисҷумҳур — нафаре, ки бояд Русияро дӯст дорад, халқашро дӯст дорад, ғами онро хӯрад, бино бар ин, тасмим хеле муҳим аст. Мо қаблан бо тамоми аҳли оила муҳокима намудем, ки ба тарафдории кӣ овоз диҳем, омадаем, ки қарзи шаҳрвандиямонро адо намоем", — мегӯяд Татяна Ахметахунова, аз дасти аберааш Ясмина гирифта.
Кормандони "Россотрудничество" ва сафорати Русия дар Тоҷикистон кӯшиш намуданд, ки раванди овоздиҳиро ба ҳадде барои овоздиҳандагон озоду осон ба роҳ монанд. Дар маркази ҳавлӣ, дар девори наздикии фаввора, маълумоти сабтшуда дар бораи тамоми номзадҳо ҷойгир карда шудааст. Илова бар ин, иттилоотро дар таблои барқии толоре, ки овоздиҳандагон бо аъзои ҳайати комисиони интихоботӣ вомехӯранд, дидан мумкин аст.
Онҳо ба бахшҳо тақсим шудаанд: қисме он шаҳрвандони Русияро қабул мекунад, ки муваққатан ба Тоҷикистон омадаанд, қисми дигар — сокинони ин ҷойро, ки ду шаҳрвандӣ доранд. Ҳатто онҳое, ки мӯҳлати эътибори шиносномаашон тамом шудааст, ё ин ки баъзе мушкилоти хурд доранд, бо пур кардани варақаи ариза роҷеъ ба сабаби он, метавонанд овоз диҳанд.
"Мо омода ҳастем, ки тамоми овоздиҳандагонро бипазирем, дарҳои ҳавзаҳо то соати 20.00 кушода аст, варақаҳоро ба миқдори кофӣ овардаанд, овоздиҳӣ оромона мегузарад, тамоми мушкилоте, ки сар мезананд, фавран роҳи ҳалли худро пайдо мекунанд", — шарҳ дод сарвари "Россотрудничество" Михаил Вождаев.
Вале агар механизм дар дохили ҳавза хуб кор кунад, пас дар кӯчае, ки мардум интизорӣ мекашанд, навбат ба таври хеле суст ҳаракат мекунанд, на ҳама тоқат карда метавонанд.
"Моро бенавбат роҳ доданд, зеро дар дастамон тифли ҳафтмоҳа дорем, аммо бисёриҳое, ки дар охири навбат меистоданд, тоқат накарда партофта рафтанд, нахостанд, ки барои худ ид офаранд. Чаро ҳавзаҳои интихоботиро зиёд намекунанд, кор осонтар мешуду, ба ҳавзаҳо низ одамони зиёд меомаданд", — шикоят мекунанд Татяна ва Даря Харитоноваҳо.
Соати 11-и субҳ ба ҳавзаи интихоботӣ сафири Русия дар Тоҷикистон Игор Лякин-Фролов омад. Ба вай ва ҳамсараш наворчаи гулҳои парчами Русия ва навиштаҷоти "Интихоботи раисҷумҳур" супурда шуд. Пас аз он ки дипломат варақаро ба қуттии овоздиҳӣ партофт, чанд дақиқае бо намояндагони матбуот ҳарф зад ва ҳамаро бо ин ид табрик кард.
"Нафарони зиёд меоянд, ин нишондиҳандаи он аст, ки дар ин ҷо, дар Тоҷикистон, бо як таваҷҷӯҳи хосе ба ҳаводиси Русия менигаранд. Мо ҳама дастгирии ҳамаҷонибаи шарикони тоҷикистониямонро ҳисс мекунем, ман бештар аз ин мегӯям, дӯстонамонро, ки дурустии самти интихобкардаи Русияро чӣ дар муносибатҳои дуҷониба, ва чӣ дар арсаи байналмилалӣ, таъйид месозанд", — эълом дошт сафир.
Сипас роҳбари намояндагии дипломатии Русия ба интихобкунандагоне, ки бори аввал ба овоздиҳӣ омада буданд, тӯҳфаҳо супурд. Яке аз онҳо, донишҷӯ Карина Тагаева буд, ки имрӯз 18 солагӣ дошт.
"Ман хеле ба ҳаяҷон омада будам, таассуротҳо ногуфтаниянд, ҳатто намедонам, ки имрӯз барои ман кадом ид муҳимтар аст — рӯзи таваллуд ё интихоботи раисиҷумҳур", — хандаомезона мегӯяд вай.
Дар маҷмӯъ имрӯз дар Тоҷикистон шаш ҳавзаи интихоботӣ кушода шуда буд, дуто дар Душанбе, якто дар Хуҷанд, дуто дар Қурғонтеппа ва якто дар Норак, ки он ҷо маҷмааи низомӣ-кайҳонии "Окно" насб карда шуда аст.
