ДУШАНБЕ, 17 фев — Sputnik. Имрӯз, 17 феврал Вазорати умури дохилаи Тоҷикистон хабар дод, ки кормандони ниҳод дар шаҳри Душанбе ҷавони 19-солаеро ба иттиҳоми ташкили фоҳишахона дастгир кардааст.
Бино бар иттилои манбаъ, рӯзи гузашта, ҳангоми амалиёти тафтишотиву бозҷӯӣ кормандони милитси ҷавони 19-солаи сокини ноҳияи Рӯдакиро ҳамчун гумонбар дар ташкил ва нигаҳдошти фоҳишахона дастгир карданд.
Тавре ВУД афзудааст, ҷавон ин ҷиноятро бо маслиҳати пешакӣ бо бародараш анҷом додааст.
"Муттаҳам, 12-уми феврали соли равон, тахминан соати 19:20-дақиқа, бо маслиҳати пешакӣ бо бародараш марди 22-солаи сокини ноҳияи мазкур, хонаи ба иҷора гирифтаашон, воқеъ дар кӯчаи Рӯдакиро ба фоҳишахона табдил дода, ба ҷавони 25-сола ва зани 35-солаи душанбегӣ барои муносибатҳои маҳрамона шароит фароҳам оварда, аз онҳо 350-сомонӣ мукофотпулӣ гирифтааст",- гуфта мешавад дар иттилои манбаъ.
Ин қазия мавриди тафтиш қарор дорад.
