ДУШАНБЕ, 28 дек — Sputnik. Сафири фавқулода ва мухтори Ҷумҳурии Тоҷикистон дар Подшоҳии Арабистони Саудӣ Заробиддин Қосимӣ бо раиси Кумитаи сармоягузории ин мамлакат Иброҳим ибни Абдурраҳмон ал-Умар мулоқот намуд.
Ба гузориши равобити умумии Вазорати умури хориҷии Тоҷикистон, дар ин дидор роҳҳои густариши ҳамкориҳои иқтисодиву тиҷорӣ ва сармоягузорӣ миёни ду кишвар баррасӣ шуданд.
Косимӣ ва ал-Умар бар зарурати фаъол намудани Кумисиюни муштараки ҳамкориҳои иқтисодиву тиҷорӣ ва фаннии ду кишвар таъкид карда тавофуқ карданд, ки дар наздиктарин замон дувумин ҷаласаи ин Кумисиюн ва форуми иқтисодиву сармоягузорӣ бо ширкати соҳибкорони ду кишвар дар шаҳри Риёз баргузор шавад.
Иброҳим ибни Абдурраҳмон ал-Умар раиси бахши арабистонии Кумисиюни муштараки ҳамкориҳои иқтисодиву тиҷорӣ ва фаннии Подшоҳии Арабистони Саудӣ ва Ҷумҳурии Тоҷикистон аст.
