ДУШАНБЕ, 19 дек — Sputnik. Маросими супоридани ҷангафзорҳои ҳарбии Русия ба ҷониби Тоҷикистон дар шаҳри Душанбе, рӯзи сешанбе баргузор шуд.
"Ин ҷангафзорҳо ба хотири он супорида мешаванд, ки Қувваҳои мусаллаҳи Тоҷикистон имконияти бештари таҳкими марз бо Афғонистонро дошта бошад", гуфт дар маросими супоридани ҷангафзорҳо раҳбари Раёсати ҳамкориҳои байнулмиллалии ҳарбии Вазорати дифоъи Русия Александр Кшимовский.
Гуфта мешавад, ки Русия ба Тоҷикистон танкҳои Т-72Б1, БТР-80, БТР-70, БМП-2, чархболҳои Ми-24 ва Ми-8, инчунин силоҳу дигар навъи техникаи низомӣ дод.
Ба гуфти Александр Кшимовский дар умум дар соли 2017 ба Тоҷикистон ҳамагӣ ба маблағи 122 миллион доллар ҷангафзорҳо дода шудааст.
"Таҳкими Қувваҳои мусаллаҳи Тоҷикистон яке аз самтҳои афзалиятноки муносиботи кишварҳои мо ба ҳисоб меравад", — гуфт ӯ.
Вай ҳамчунин афзуда, ки Тоҷикистон ҳамеша метавонад ба дастгирии Русия дар соҳаи амният такя занад.
"Қувваҳои мусаллаҳи кишварҳои мо бояд ба ҳама гуна таҳдидҳо омода бошанд", — гуфт Кшимовский.
Пештар раисҷумҳури Русия Владимир Путин дар нишасти хабарӣ изҳор дошт, ки Русия омода аст аз Афғонистон дар муборизааш бо таҳдидҳои теруристӣ пуштибонӣ кунад.
"Мо мебинем, ки хатару таҳдид аз сӯи теруристҳои байналмилалӣ дар Афғонистон рӯ ба афзоиш ниҳодааст. Мебинем, ки сохторҳои мусаллаҳи тундрав бахшҳое аз қаламрави Афғонистонро дар марз бо Тоҷикистон, Узбакистон ва Туркманистон ба даст овардаанд. Бегумон, ин падидаҳо моро бисёр нигарон мекунанд, зеро мо дар он минтақа пойгоҳҳои низомӣ дорем", — таъкид кард раҳбари Русия.
Путин бо ишора ба ин ки ҳукумати марказии Кобул ниёз ба ҳимояти ҷомеъаи байналмилалӣ дорад, афзуд, ки Русия омода аст аз ин кишвар ҳимоят кунад.
"Мо дар солҳои гузашта низ кадрҳои миллӣ, нерӯҳои интизомӣ ва мусаллаҳи Афғонистонро омӯзиш ва таслиҳоту фанновариҳои низомиро ба Афғонистон таҳвил додаем", — афзуд вай.
