ДУШАНБЕ, 11 дек — Sputnik. Ба гузориши равобити умумии БМТ, Раёсати Бонки миллии Тоҷикистон ин созмонҳоро бар асоси Қонуни созмонҳои хурди эътиборӣ ва Қонуни инҳилоли созмонҳои қарзӣ аз фаъолият боз медоронад.
"Иҷозатномаҳои ҶСП ТҚХ «Зироат-04 », ҶДММ ТҚХ "Ганҷ-2006" ва ҶДММ ТАҚХ "Диси инвест", ки аз ҷониби Бонки миллии Тоҷикистон барои анҷом додани амалиётҳои бонкӣ дода шудааст, бозхонд карда шуданд", — гуфтанд дар равобити умумии БМТ.
Ҷанбаҳои дигари фаъолияти созмонҳои ёдшуда бар асоси қарорҳои БМТ аз ҷониби масъулини Бонки миллии Тоҷикистон омӯхта ва баррасӣ карда мешаванд.
Чанде пеш Бонки миллии Тоҷикистон ду созмони хурдасармоягузориро аз вом додан ба шаҳрвандон боз доронда буд.
БМТ бар асоси қарорҳои №№143 ва 144 аз 30 октябри соли 2017 иҷозаномаҳои ширкатҳои хурдасармоягузории "Дурнамои деҳоти Рӯдакӣ" ва "Фермер"-ро бозхонд карда буд.
