ДУШАНБЕ, 23 ноя — Sputnik. Дар Куреи Ҷанубӣ дар бораи як соли раёсати Шавкат Мирзиёев дар Ҷумҳурии Узбакистон китоб навиштанд.
Муаллифи китоб рӯзноманигори машҳури куреӣ Чо Чол Хён аст, ки ҳамзабон ба сохтани филмҳои мустанад низ маъруф будааст.
Китоб аз 320 саҳфа иборат буда, 50 ҳазор нусха мунташир шудааст. Тадқиқот аз ҳашт боб иборат аст ва бо аксҳо ороиш дода шудааст.
Дар китоби "Раиси Ҷумҳурии Узбакистон Шавкат Мирзиёев" муфассал дар бораи фаъолияти Шавкат Мирзиёев пас аз расидан ба сари қудрат нақл мешавад ва иқтибосҳо аз суханрониҳои ӯ дар маросимҳои байналмилалӣ оварда мешавад.
Як боби китоб махсус ба сиёсати хориҷии раисҷумҳур бахшида шудааст. Гуфта мешавад, Шавкат Мирзиёев баъди таъин шуданаш ба вазифаи иҷрокунандаи вазифаи раисҷумҳури Узбакистон ва интихоб шуданаш ба раёсати Ҷумҳурии Узбакистон ба ҳамкориҳои минтақаӣ такони дигар бахшид ва муносибатҳои Узбакистонро бо ҳамсоягонаш ба сатҳи беҳтар баровард.
Ҳамчунин дар бораи сафару дидор ва мулоқотҳои Мирзиёв дар соли гузашта бо сарони кишварҳои ҷаҳон ва созмонҳои хориҷии бонуфуз маълумот дода шудааст.
Муаллифи китоб аз муносибатҳои Узбакистону Куреи Ҷанубӣ низ ба таври муфассал ёдовар шудааст.
