ДУШАНБЕ, 21 ноя — Sputnik. Корманди пешини Ситоди кулли Вазорати дифоъи Русия, ки дар Сурия ба ДОИШ пайваста буд, ба Русия истирдод шуд, гуфт сардори дафтари иттилоърасонии Вазорати умури дохилии Тоҷикистон Умарҷон Эмомалӣ.
"Тоҷикистон пас аз як моҳ бозҷӯӣ шаҳрванди Русия Денис Хисамовро ба он кишвар пас дод. Вай дар Туркия боздошт ва ба далели доштани гузарномаи сохтаи Тоҷикистон, ба Тоҷикистон истирдод шуда буд", — тавзеҳ додааст сухангӯи ВУД ҶТ.
Вазорати умури дохилии Тоҷикистон аз боздошти ин шаҳрванди Русия 23 октябр хабар дода ва ӯро муттаҳам ба ҳамдастӣ бо созмони теруристии "Давлати исломӣ" карда буд.
Бино ба иттилоъи Дафтари матбуотии ВУД ҶТ, Хисамов Денис Франгизович ном шаҳванди Русия, ки 18 декабри соли 1983 дар шаҳри Краснодар зода шудаву дорои маълумоти олӣ, номзади улуми техникӣ ва капитани Вазорати дифоъи Русия будааст.
Гуфта мешуд, ки Денис Хисамов бо шиносномаи сохтаи шаҳрванди Тоҷикистон ба Сурия рафтаву ба "Давлати исломӣ" пайваста ва дар ҷангҳои Ироқу Сурия ширкат кардааст.
Вай моҳи апрели соли 2017 ба Туркия рафтааст то аз онҷо барои анҷоми амалиёти теруристӣ ба Русия биравад. Нерӯҳои амниятии Туркия ӯро боздошт карда ва ба далели доштани шиносномаи сохтаи Тоҷикистон, ӯро ба нерӯҳои амниятии Тоҷикистон вогузор кардаанд.
Аммо дар вокуниш ба ин хабар сафорати Русия дар Тоҷикистон гуфта буд, ҳеч иттилоъе дар бораи шаҳрванди Русия дарёфт накарда, ки гӯё узви гурӯҳи теруристии "Давлати исломӣ" бошад.
"Сафорат на аз каналҳои расмӣ ва на аз каналҳои ғайрирасмӣ чунин иттилоъеро дарёфт накардааст", — гуфта буд Олег Жуков, муовини консули сафорати Русия дар Душанбе ба хабаргузории "РИА Новости".
