ДУШАНБЕ, 16 окт — Sputnik. Раиси Кумитаи сохтори давлатӣ ва худидоракунии маҳаллӣ дар Маҷлис Абдураҳим Холиқзода дар муаррифии ин тарҳи қонун гуфт, ки онро Ҳукумати ҶТ ба манзури иҷрои банди 2 нақшаи барномаҳое таҳия кардааст, ки раисҷумҳури Тоҷикистон, ки дар мулоқот бо масъулону фаъолони шаҳри Душанбе аз 15 феврали соли 2017 дастур додааст.
Ба иттилоъи дафтари матбуотии Маҷлиси намояндагон, ин пешнависи Қонун мақоми пойтахти Ҷумҳурии Тоҷикистон, хусусиятҳои идоракунӣ ва асосҳои ташкилӣ, ҳуқуқӣ, иқтисодӣ ва иҷтимоии фаъолияти онро муқаррар менамояд.
"Дар ин тарҳ шаҳри Душанбе ҳамчун пойтахти Ҷумҳурии Тоҷикистон воҳиди марзиву маъмурие дониста шудааст, ки мақоми махсуси давлатӣ дошта, дар он қароргоҳи расмии Раиси Ҷумҳурии Тоҷикистон ҷойгир буда, маҳалли нигоҳдории нусхаи аслии матни Конститусияи Ҷумҳурии Тоҷикистон ва чун маҳалли омодасозии шакли аслии рамзҳои давлатии Ҷумҳурии Тоҷикистон муайян гардидааст", — гуфта мешавад дар иттилоъия.
Ҳамчунин кафолатҳои таъмини функсияҳои пойтахт муайяншуда, ваколатҳои Маҷлиси вакилони халқ ва ваколатҳои мақомоти иҷроияи маҳаллии ҳокимияти давлатӣ дар пойтахт дар алоҳидагӣ муайян гардидааст. Инчунин, меъёри мушаххас оид ба ҳудуди шаҳри Душанбе пешбинишуда, асосҳои ба амал баровардани фаъолияти меъморӣ, шаҳрсозӣ ва сохтмон дар ҳудуди пойтахт ва хусусиятҳои таъминоти моддӣ ва молиявии пойтахт муқаррар шудаанд.
