ДУШАНБЕ, 11 сен — Sputnik. Ба гузориши равобити умумии ВКД ҶТ, падар духтари яксолаашро бо худрав пахш кардааст.
"Рӯзи7-уми сенятбри соли 2017, тахминан соати 17:20 Баҳодур Ҷонимқулов, соли таваллудаш 1983, сокини ноҳияи Хуросон, дар дохили ҳавлии истиқоматиаш ҳангоми ба қафо рондани автомашинаи шахсиаш тамғаи "Опел-Астра", аз беэҳтиётии худ духтари хурдсолаш, Ҷонимқулзода Маҳина Баҳодур соли таваллудаш 2016-ро пахш намудааст",- омадааст дар хабарнома.
Дар натиҷа ноболиғ ҷароҳати вазнини ҷисмонӣ бардошта дар роҳ ба беморхона ба ҳалокат расидааст.
Ҳамчунин дар натиҷаи гузаронидани чорабиниҳои оперативӣ-ҷустуҷӯӣ кормандони милитсия марди 28-солаи сокини ноҳияи Тоҷикободро бо гумони аз беэҳтиётӣ ба марг расонидан дастгир намуданд.
Номбурда, 15-уми ноябри соли 2016, тахминан соати 10:00-дақиқа, дар назди ҳавлии истиқоматиаш ҳангоми ба қафо рондани автомашинаи шахсиаш тамғаи "Опел-Астра", аз беэҳтиётиаш духтари ноболиғаш, Хосияти Меҳроҷиддин, соли таваллудаш 2013-ро, ки ба бозӣ машғул будааст, пахш намудааст. Дар натиҷа хурдсол ҷароҳати вазнини ҷисмонӣ бардошта, дар беморхона ба ҳалокат расидааст.
Аз рӯи ин ҳодисаҳо тафтишот идома дорад.
