ДУШАНБЕ, 31 авг — Sputnik. Ба гузориши хадамоти матбуоти раисҷумҳур, Эмомалӣ Раҳмонро дар фурудгоҳи байналмилалии Пекин, ки ба хотири истиқболи меҳмонон идона ороста шуда буд, намояндагони воломақоми ҳукумати ин кишвар гарму самимӣ истиқбол гирифтанд.
"Ба хотири пазироии раисҷумҳури Тоҷикистон горди фахрӣ саф ороста, парчамҳои давлатии Тоҷикистону Чин партавафшонӣ дошт", — омадааст дар хабарнома.
Интизор меравад, ки дар ин сафар Эмомалӣ Раҳмон бо Раиси Ҷумҳурии Чин Си Ҷинпин, роҳбарони воломақоми ҳукумати ин кишвар ва намояндагони ширкатҳои бонуфузи чинӣ мулоқот хоҳад кард.
Ҷумҳурии Чин шарики стратегии Тоҷикистон буда, таҳким ва густариши робитаҳои дӯстонаи Тоҷикистон бо давлати Чин яке аз самтҳои афзалиятноки сиёсати хориҷии Тоҷикистон мебошад.
Заминаи меъёрӣ-ҳуқуқии ду кишварро тақрибан 200 санади дуҷониба ташкил медиҳад.
Пештар хабар дода шуд, ки Чин Тоҷикистонро ба нишасти БРИКС даъват кард.
