ДУШАНБЕ, 23 авг — Sputnik. Тоҷикистон ва Чин қасд доранд гардиши коло миёни ду кишварро то соли 2020 ба 3 милёрд дулор бирасонанд.
Ба ин манзур Утоқи бозаргониву саноеъи Тоҷикистон ва Кумитаи густариши тиҷорати байналмилалии устони Ҳайнон ёддошти тафоҳуми ҳамкорӣ имзо карданд.
Ин ёддоштро раиси УБС ҶТ Шариф Саид ва мудири Кумитаи густариши тиҷорати байналмилалии устони Ҳайнон Ли Ҷудзе дар фарҷоми ҳамоиши бозаргонҳои тоҷику чинӣ имзо карданд, ки 21 август дар ҳотели "Шератон" баргузор шуд.
Чинро дар ин ҳамоиш 25 ширкати бузург аз устони Ҳайнон намояндагӣ карданд, ки дар заминаҳои кишоварзӣ, санъат, гардишгарӣ, хӯрокворӣ, тарабору хушкбор, сармоягузорӣ ва дигар риштаҳо фаъол ҳастанд.
Тоҷикистон ва Чин аз солҳо пеш дар заминаҳои нерӯи барқобӣ, илму фанноварӣ, кишоварзӣ, таробарӣ, муҳандисӣ, сохтусоз, истихроҷи кониҳо, саноеъи сабук ва коркард ҳамкорӣ мекунанд.
