ДУШАНБЕ, 31 июл — Sputnik, Нилуфар Неккадам. Ҳамакнун ин паҳлавони ҷавон беш аз пеш тамрин дорад то ба ҳадафаш, ки қаҳрамон шудан дар Бозиҳои Олимпии соли 2020 аст, бирасад.
Sputnik Тоҷикистон бо Хушбахт Қурбонмаҳмадов дар бораи зиндагӣ дар Амрико, мушкилоти соҳаи варзиш ва талошҳояш барои Бозии Олимпии соли 2020 суҳбат кард.
Зиндагӣ дар Амрико
Хушбахт Қурбонмаҳмадов мегӯяд, ки зиндагиаш дар Амрико хуб аст ва аҳволи ҷамоъати тоҷикон ҳам дар ин кишвар хуб аст. Бисёре онҳо кору боре доранд ва ҷавонони бсиёре ба варзишу обу тоб додани бадан машғул ҳастанд. Ҳама ҷашнҳои миллиро ҳамроҳ мегузаронанд ва ба якдигар ёрӣ мерасонанд.
"Маро буду бош дар Амрико бештар аз барои тамринҳои мунтазамам хуш аст", — гуфт Хушбат дар суҳбат бо Sputnik Тоҷикистон.
Оғози роҳ
Хушбахт Қурбонмаҳмадов аз 12-солагӣ варзиши ҷудо ё дзюдоро тамрин мекунад. Нахустин мусобиқае, ки дар он пирӯз шуда, қаҳрамонии шаҳри Хоруғ будааст. Ӯ дар ин мусобиқа дар вазни 32 килуграм мақоми аввалро ба даст овардааст.
Пас аз нахустин пирӯзӣ Хушбахт тасмим гирифта тамринро дар ин ришта аз варзишҳои размӣ идома диҳад ва дар қаҳрамонии ҷумҳурӣ низ зӯрозмоӣ кунад. Дар ин мусобиқот ҳам Хушбахт дар вазни 40 килуграм мақоми аввалро аз худ кардааст. Аз он рӯз буд, ки зиндагиашро бо варзишу ҷудо пайвастааст.
Пас аз пирӯзӣ дар қаҳрамонии навҷавонони кишвар, Хушбахт барои ширкат дар мусобиқаи байналмилалӣ дар шаҳри Минск — пойтахти Белорус "роҳхат" дарёфт кард. Дар ин мусобиқот варзишкори тоҷик мақоми севумро ба даст оварда буд.
Бе сармоягузор
Хушбахт ҳафт моҳ пеш аз ин ба Амрико рафта будааст. Вай мегӯяд, ки ҳамроҳ бо чанд варзишкори дигар барои ширкат дар сабқате аз тарафи кишвари Русия ба Амрико рафта ва пас аз баргузории он мусобиқот тасмим гирифтааст дар он кишвар бимонаду ҳунарашро такмил диҳад.
Ба гуфти ин варзишкор, вай аз касе ё созмоне пуштибонии молӣ намебинад. Худаш кор мекунаду аз даромадаш ҳазинаи тамринҳояшро пардохт мекунад ва ба хонаводааш дар Тоҷикистон низ кумак мерасонад.
Охирин мусобиқае, ки Хушбахт дар он ширкат кардаву пирӯз шуда, чанде пеш дар иёлати Флорида баргузор шуда буд. Ин мусобиқа Ҷоми ҷудои Амрико буд ва Хушбахт дар он мақоми аввалро ба даст овард. Ҳазинаи ширкаташ дар ин мусобиқаро бошгоҳе пардохт карда, ки Хушбахт дар он тамрин мекунад. Вале дар дигар сабқатҳо ӯ бо ҳазинаи худаш ширкат мекардааст.
"Танҳо ҳамин Ҷоми ҷудои Амрико аз ҷониби давлат сармоягузорӣ шуду бас", — гуфт Хушбахт.
Нархи наво дар Амрико чанд пул аст?
Ин варзишкори тоҷик мегӯяд, ки моҳиёна барои иҷораи манзил 750 дулор ҳазина мекунад ва кулли ҳазинаҳояш дар як моҳ бештар аз 1300 дулор будааст.
Вай мегӯяд ин ҳазинаҳоро мепардозад то ба орзӯяш, ки қаҳрамон шудан дар Олимпиади соли 2020 аст, бирасад.
"Ман ба зӯри бозуи худ бовар дорам", — мегӯяд Хушбахт ва меафзояд, ки барои дарёфт кардани "роҳхат" ба Олимпиади ҷаҳонӣ бояд дар чандин мусобиқа зӯрозмоӣ кунад ва имтиёзҳоеро ба даст оварад.
"Барои ширкат дар ҳар мусобиқае ман бояд худро номнавис кунам ки ҳаддақалл 100 дулор ҳазина дорад".
Варзишкорони тоҷик чӣ кам доранд?
Хушбахт мегӯяд, ки дар Тоҷикистон варзишкорони хуб бисёранд, вале набуди сармоягузорӣ онҳоро ақиб мекашад.
"Агар варзишкор аз сармоя дошта бошад, метавонад дар ҳама сабқатҳо ширкат кунад, тамринашро тарк накунад ва ҳунару нерӯяшро аз даст надиҳад. Танҳо бо ин роҳ варзишкор метавонад муваффақ бошад ва дар мусобиқаҳои кишварӣ ва ҷаҳонӣ қаҳрамон шавад".
Орзуи қаҳрамон шудан дар Олимпиади 2020
Хушбахт мегӯяд, ки орзу дорад дар қаҳрамонии ҷаҳон ширкат кунад.
"Худо бихоҳад, ман ба худ бовар дорам, ки медоли тиллои Олимпиади соли 2020 дар Токиоро бар гарданам хоҳам овехт", — мегӯяд вай бо бовар ба худу Худо.
Вай ҳамчунин орзу дорад, ки пас аз пирӯзӣ дар қаҳрамонии ҷаҳон ба Тоҷикистон бар гардад ва дар сабқати кушоди Осиё ширкат кунад.
