ДУШАНБЕ, 6 июн — Sputnik. Бино ба иттилоъи равобити умумии Кумитаи ҷаонон, варзиш ва гардишгарӣ рӯзҳои 3 ва 4 июн бо ибтикори ин ниҳод ҳашар барпо шуд.
Дар ҳашар раиси кумита Аҳтам Абдуллозода кормандони ҳамин ниҳод, омӯзгорону донишҷӯёни Донишкадаи тарбияи ҷисмонӣ, Коллеҷи тарбияи ҷисмонӣ ва ризокорон ширкат карданд.
Манбаъ меафзояд, ки ҳашар ҷиҳати саҳм гузоштан дар татбиқи қарори раиси шаҳри Душанбе "Дар бораи эълон намудани 150 рӯзи ободонию созандагӣ, ниҳолшинонию кабудизоркунӣ" гузаронида шуд.
Дар ҳашар замини бекорхобидаи назди таваққуфгоҳи нақлиёт воқеъ дар кӯчаи Гагарини ба тартиб дароварда шуд.
Саҳни ин минтақаро аз сангу шағал, ашёҳои фарсудашуда тоза карда заминашро нарм карданд.
Ба гуфтаи масъулин, дар назар аст, ки ин маконро барои истироҳати сокинони пойтахт ба гулгашт табдил диҳанд.
Ёдовар мешавем, ки қаблан раиси шаҳри Душанбе Рустам Эмомалӣ дар пойтахт 150 рӯзи ободонӣ эълон намуд. Иқдоми мири шаҳр дар бораи эълон намудани 150 рӯзи ободонӣ ва ниҳолшинониву кабудизоркунӣ дар пойтахт таҳти унвони "Хуррамгардонии Душанбешаҳр — рисолати сокинони пойтахт!" гузаронида мешавад.
