ДУШАНБЕ, 23 апр- Sputnik. Бино ба гузориши сухангӯи устондории ВМКБ Нилуфар Асламшоева, роҳи Хоруғ — Ишкошим имрӯз аз сангрезиш поксозӣ ва барои рафту омади мусофирон боз шуд.
"Сарфи назар аз бориши пай дар пай ва хатари рехтани санг, кӯҳпораи азиме, ки ҳаҷми он 6,5 ҳазор метри мукаъабро ташкил медод, дар замоне нисбатан кӯтоҳ аз роҳи таркондан ва рӯфтан бо тракторҳои сангин поксозӣ карда шуд".
Вай афзуд, ки дар баробари кормандони сохторҳои масъул, соҳибкорони маҳаллӣ низ дар поксозии кӯҳпора ва барқарор кардани ҳаракати нақлиёт аз ин мавзеъ саҳмашонро гузоштаанд. Аз ҷумла, соҳибкор аз шаҳри Хоруғ, Мамадбек Мамадбеков техникаи роҳсозии худро барои кушодани роҳ овард, ки кори роҳкушоёнро бисёр осон кард.
Пештар хабар дода шуд, ки сангрезиш дар дараи Пишпарин дар ноҳияи Шуғнон, ки 16 — 17 апрел рӯй дода буд, рафту омад дар роҳи Хоруғ — Ишкошимро баста аст. Хушбахтона, ин офати табиъӣ талафоти ҷонӣ дар пай надошт.
Дар ин росто Кумитаи ҳолатҳои фавқулодаи Тоҷикистон бо такя бар додаҳои Созмони ҳавошиносии кишвар аз шаҳвардон хостааст, 22 — 23 апрел аз сафар ба Вилояти мухтори куҳистони Бадахшон худдорӣ намоянд, зеро дар ин рӯзҳо бориши борон ва эҳтимоли резиши барфу сангу кӯҳпораҳо бисёр боло аст.
