ДУШАНБЕ, 7 апр — Sputnik. Ниҳодҳои ҳавонавардии Тоҷикистону Узбакистон тарҳи қарордоди мусофирбарии ҳавоӣ миёни пойтахтҳои ду кишварро баррасӣ карданд.
Бино ба гузориши хабаргузории ТоҷикТА, музокироти ин ниҳодҳо дар Тошканд баргузор шудааст.
Ин қарордод заминаи қонуниро барои роҳандозии парвозҳои мунтазам миёни ду кишвар омода мекунад.
Пештар, ширкати мусофирбарии ҳавоии "Ӯзбекистон ҳаво йӯлларӣ" нахустин парвоз дар масири Тошканд — Душанберо, ки мебоист фардо, 4 апрел анҷом шавад, лағв карда буд.
Хабаргузории РИА Новости аз қавли намояндаи ин ширкат хабар дод, ки ин парвоз ба далели "камбуди мусофир" лағв шудааст.
"Парвозе, ки қарор буд 4 апрел анҷом шавад, ба далели камбуди мусофир лағв шуд", — гуфт намояндаи ширкати "Ӯзбекистон ҳаво йӯлларӣ".
Ёдоварӣ мешавад, ки ин ширкат дар поёни моҳи феврал эълон карда буд, ки аз 4 апрел парвозҳои паёпай миёни Тошканду Душанберо оғоз мекунад ва ҳафтае ду парвоз хоҳад дошт.
