Хабарнигори Sputnik Тоҷикистон бо Фарзона Ақназарова дар бораи зиндагиву кору нақшаҳояш суҳбат кард.
Ақназарова Фарзона 26-уми декабри соли 1992 дар ВМКБ ба дунё омадааст. Баъди чанде хонаводаи Фарзона аз Бадахшон ба Турсунзода ва аз он ҷо ба шаҳри Душанбе кӯч баст. Мактабро дар шаҳри Душанбе хатм кардааст. Собиқ ҳимоятгари мунтахаби занонаи футболи Тоҷикистон. Дастаи дӯстдоштааш Раел-Мадрид ва футболбози дӯстдоштааш Серхио Рамус мебошад. Шуғли дӯстдоштааш варзиш ва сурудхонӣ. Оиладор соҳиби як фарзанд.
Фарзона мегӯяд, ки аз кӯдакӣ ба варзиш шавқи беандоза дошт. Футболро бештар дӯст медошт, чун бародараш низ ба ҳамин намуди варзиш машғул буд.
"Ман ҳамеша аз паси бародарам медавидам. Вале мушкил ин буд, ки замоне, ки ман дар мактаб таҳсил мекардам, дар шаҳри Турсунзода дастаи футболи духтарона набуд".
Вале набудани дастаи духтаронаи футбол Фарзонаро аз роҳаш пас нагардонд. Ӯ бо иродаи қавӣ машқро идома дода, ҳамроҳи бародараш, ки гоҳо намехост ӯро бо худ бигирад, ба варзиш машғул мешуд.
Пас аз чанде дар шаҳри Турсунзода дастаи духтаронаи футбол низ пайдо шуд. Фарзона Ақназарова яке аз нахустин духтароне шуд, ки ба ин даста шомил шуда буданд.
"Мураббии мо Элдор Абдураҳмонович буд. Ӯ нахустин касе буд, ки дар шаҳри Турсунзода дастаи футболи занонаро роҳандозӣ кард".
Фарзона футболбозиро аз синфи ҳафтум оғоз кард. Вай мегӯяд, ки бозии футбол осон нест: "Футболбоз бояд иродаи қавӣ дошта бошад, вале муҳимтар аз ҳама хостан аст. Зеро хостан тавонистан аст. Албатта дар аввал мушкилот бисёр буд. Ҳар рӯз се соат машқ кардан осон нест. Вале касе, ки футболро интихоб мекунад, бояд шеваи дурусти зиндагӣ дошта бошад. Реҷаи хӯрокхӯриро риоят кунад. Касе, ки ин варзишро дӯст доштааст, дигар наметавонад бе он зиндагӣ кунад".
Ин тоҷикдухтари варзишгар футболро варзиши мардона намешуморад. Ӯ мегӯяд варзиш ҳам барои духтарон ва ҳам писарон баробар аст: "Барои духтарон машғул шудан ба футбол мушкил нест. Вале дар Тоҷикистон мардум нисбат ба футболи духтарона чандон назари хуб надоранд. Бештари волидон духтарони худро сарфи назар аз хоҳишашон иҷоза намедиҳанд ба ин варзиш машғул шаванд".
Фарзона таъкид мекунад, ки наздиконаш ӯро дар ин роҳ дастгирӣ мекарданд: "Бародарам аввал мухолиф буд, вале вақте бозиямро дид, дигар чизе нагуфт".
Пас аз он ки Фарзона синфи 9-ро ба поён бурд, хонаводаашон аз шаҳри Турсунзода ба шаҳри Душанбе мекӯчад. Ин ҷо Фарзонаро дастовардҳои бузурге интизор буданд. Мураббиёни дастаҳои пойтахт ӯро аз бозиҳояш хуб мешинохтанд ва аз омадаш шод ҳам шуданду зуд дар дастаи нав сардор интихоб карданд.
"Вақте ба Душанбе омадам, мураббии дастаи футболи занона Сулаймон Бобокалонов маро аз пеш мешинохт. Ман гуфтам: Салом, ман омадам. Ӯ дар посух гуфт: Хушомадӣ! Ва маро ба даста қабул кард", — мегӯяд табассумкунон Фарзона.
Дар шаҳри Душанбе Фарзона Ақназарова ба дастаи мунтахаби занонаи миллии Тоҷикистон шомил шуд. Ӯро дар ин даста низ сардор интихоб карданд. Вале пас аз хатми мактаб Фарзона ҳам аз футбол ва ҳам аз Тоҷикистон дур шуд.
"Бо дастаи мунтахаби занонаи Тоҷикистон мо дар сабқатҳои зиёди байналмиллалӣ ширкат кардем. Бароям дидани шаҳрҳои нав хеле хуш буд. Вале ин давра низ ба поён расид. Тасмим гирифтам, ки дар оянда риштаи рӯзноманигорӣ таҳсил кунам ва шореҳи варзишӣ шавам. Вале чунин ҳам нашуд".
Фарзона мехост дар бахши рӯзноманигории Донишгоҳи славянии Русияву Тоҷикистон донишҷӯ шавад. Ба гуфтаи ӯ, он замон бе пуштибонӣ, ё ба истилоҳ "тағо", донишҷӯ шудан дар ин донишгоҳ амри маҳол буд. Фарзона низ натавонист донишҷӯ шавад ва бо дили шикаста Маскав раҳсипор шуд, ки падару модараш онҷо рафта буданд.
Вале Фарзона мегӯяд, ки далели аслии тарки Тоҷикистон карданаш нокомӣ дар вуруд ба донишгоҳ набуд. Балки ӯ дар Тоҷикистон ояндае барои футболи духтарона намедид: "То кунун бо духтарону дӯстонам, ки ҳамроҳ бозӣ мекардем, дар тамос ҳастам ва мебинам ки сатҳи футболи занона ҳануз ҳам пойин аст. Ба духтарони футболбоз ҳатто роҳкиро пардохт намешавад".
Ба гуфти Фарзона, пуле, ки Федеросюни футбол барои футболи духтарона ҷудо мешавад, дар самти лозима ҳазина намешавад.
Фарзона пас аз омадан ба Маскав, дар дуконе фурӯшанда шуд. Ҳамзамон ҳунари ороишу пероиши рӯйу мӯйро низ аз худ кард. Ӯ ҳафт сол боз футболбозӣ накардааст, вале ҳамчунон варзишро фаромӯш намекунад: "Дар Маскав ҳам бомдодон дар назди ҳавлӣ ба давидану машқи бадан машғул мешавам. Пас аз шавҳар кардану фарзанддор шудан фикр кардам, ки бояд футболро фаромӯш кунам, вале нашуд".
Ташкили дастаи футболи занона дар шаҳри Маскв орзуи деринаи ин гурдофариди тоҷик аст. Мегӯяд солҳо боз ин озруро дар дил дорад, вале имкон даст намедиҳад. Ӯ мехоҳад духтарони тоҷикро ба тарзи ҳаёти солим тағрибу ташвиқ кунад.
"Акнун ман барои ташкили дастаи футболи занона дар Маскав тасмими ниҳоиямро гирифтам. Бародарам ваъда дод, ки кумакам мекунад. Мехоҳам бо ҳамкорӣ ва дастгирии созмони ҷамъиятии "Нур" ин мақсадамро амалӣ намоям".
Ҳамакнун Фарзона тарҳи худ барои ташкили дастаи занонаи футбол дар Маскавро такмил мекунад то ба пуштибонон муаррифӣ кунад. Дар ин кор барояш комёбӣ орзу мекунем.
