ДУШАНБЕ, 23 фев — Sputnik. Сабқати байналмиллалӣ ба 25-солагии муносибатҳои сиёсии Тоҷикистону Русия бахшида шуд.
Мусобиқаи шоҳмот бо ибтикори ташкилоти ҷамъияти "Нур" ва дастгирии сафорати Тоҷикистон дар Русия, Департаменти сиёсати миллӣ ва робитаҳои байниминтақавии шаҳри Маскав гузаронида шуд.
Дар маросими ифтитоҳи мусобиқа Сафири мухтор ва фавқуллодаи Тоҷикистон Имомуддин Сатторов, раиси ташкилоти ҷамъиятӣ ва минтақавии "Нур" Алимамад Боймамадов ва президенти федератсияи муҳоҷирон Вадим Коженов иштирок намуданд.
Зимни суханронӣ сафири ҶТ дар ФР Имомуддин Сатторов қайд кад, ки "баргузории чорабиниҳои варзишию фарҳангӣ бо иштироки намояндагони миллатҳои гуногун боиси якдигарфаҳмии байни халқҳо мегардад ва алоқаи байни миллатҳои мухталифро пурзӯртар мегардонад".
Дар мусобиқа зиёда аз 60 нафар варзишгар, намояндагони кишварҳои мухталиф аз қабили Тоҷикистон, Русия, Озарбойҷон, Узбакистон ва Қирғизистон иштирок намуданд.
Ҳамчунин қайд гардид, ки бахшида ба 25-солагии муносибатҳои сиёсии Тоҷикистону Русия дар соли равон баргузории дигар чорабиниҳо дар назар аст.
Сабқат байни мардон ва занон сурат гирифта, ҳамаи ғолибон бо дипломҳо ва медалҳо қадрдонӣ шуданд.
