ДУШАНБЕ, 14 фев — Sputnik.Кумитаи ҳолатҳои фавқулодда ва дифоъи ғайринизомии Тоҷикистон ба таваҷҷуҳи шаҳрвандони кишвар мерасонад, ки бино бар додаҳои Созмони ҳавосанҷии Тоҷикистон, аз 15-ум то 18-уми феврал бориши барфу борони шадид ва дар ноҳияҳои кӯҳистонии кишвар бориши тарбарф интизор меравад.
Бино бар иттилоъи Дафтари матбуоти КҲФ, дар роҳҳои худравгарди Душанбе — Хуҷанд, Душанбе — Лахш, Душанбе — Рашт, Душанбе — Сангвор, Душанбе — Хоруғ, Рӯшон — Хоруғ, Хоруғ — Ишкошим ва Хоруғ — Мурғоб эҳтимоли яхбандӣ ва дар минтақаҳое роҳбандӣ аз барф ва хатари лағзиши тарма вуҷуд дорад.
Бо таваҷҷуҳ ба ин шароити обу ҳаво, Кумитаи ҳолатҳои фавқулодда бори дигар аз шаҳрвандон дархост кардааст, ки ҳаддалимкон аз сафар ба манотиқи хатарноки тармахезу яхӣ худдорӣ кунанд ва то беҳтар шудани шароит аз ҷамъоварии ҳезум ва шикор ҳам даст нигаҳ доранд.
Ронандагон бояд ҳангоми ҳаракат дар роҳҳову маҳаллҳои куҳӣ ва ё маконҳои тармахез акидан фосилаи таъиншуда миёни худравҳоро риоя кунанд.
